Huawei كومپانياسى قارجىلىق قولداۋشىلارىنان ايىرىلدى. فوتو: VOA.

قۇراما شتاتتاعى تانىمال باسىلىم The Wall Street Journal-دىڭ حابارىنا قاراعاندا، ەكى ءىرى ترانسۇلتتىق بانك قىتايلىق تەحنولوگيا كوشباسشىسى Huawei-ءدى قارجىلاي قولداۋدى توقتاتا تۇراتىنىن مالىمدەگەن.

HSBC جانە Standard Chartered قاتارلى ءىرى بانكتەر Huawei كومپانياسى ءۇشىن قارجىلاي قولداۋ جاساۋ نەمەسە قىزمەت كورسەتۋدىڭ قۇنى تىم قىمباتقا تۇسەتىنىن ايتادى. اتالعان باسىلىمنىڭ ايتۋىنشا، بۇل ەكى بانك Huawei-ءدىڭ جاھاندىق قارجى نارىعىنا شىعۋىنا ۇلكەن ءرول اتقارىپ كەلگەن.

Huawei كومپانياسى – قىتاي تەحنولوگيا كومپانيالارىنىڭ كوشباسشىسى. ول قىتايدىڭ ەڭ ءىرى تەلەكوممۋنيكاتسيالىق جابدىقتارىن وندىرەتىن كاسىپورنى. قازىرگى كەزدە اقش-تىڭ يرانعا باعىتتاعان سانكتسياسىن بۇزدى دەگەن ايىپپەن ادىلەت مينيسترلىگى جاعىنان تەرگەۋ قابىلداۋدا.

كومپانيانىڭ قارجى ديرەكتورى مىڭ ۋانجوۋ اقش-تىڭ ءوتىنىشى بويىنشا كانادادا تۇتقىندالىپ، كەيىن كەپىلدىكپەن بوساتىلدى. اقش تارابى مىڭ ۋانجوۋدى يرانعا قارسى سانكتسيانى بۇزۋ ءۇشىن الاياقتىق جاسادى دەپ كۇدىكتەنەدى. مالىمەتتەرگە قاراعاندا، جوعارىدا اتالعان HSBC بانكى مىڭ ۋانجوۋدىڭ جالعان مالىمەتتەرىن قابىلداعان.

قازىر Huawei كومپانياسىنىڭ الەمنىڭ 170-تەن استام ەلىندەگى جۇمىستارىنا Citibank بانكتىك قىزمەت كورسەتىپ وتىر. The Wall Street Journal باسىلىمىنىڭ حابارىنا قاراعاندا، Citibank مالىمدەمە جاساپ Huawei كومپانياسىنا قىزمەت وتەۋ جوسپارىن قايتا قاراستىراتىنىن، بۇل رەتتە اقش تارابىنىڭ مامىلەسىنە باسا نازار اۋداراتىنىن ايتقان.

HSBC بانك بولسا وتكەن جىلى Huawei-گە جاڭا قارجى قىزمەتتەرىن ۇسىنۋدى توقتاتۋ تۋرالى شەشىم قابىلدادى. ال، جاقىندا بۇنداي شەشىمدى Standard Chartered Bank تە قابىلداعان. الداعى ۋاقىتتا Citibank اتالعان كومپانياسىنا قىزمەت وتەۋدەن باس تارتاتىن بولسا، قىتايلىق تەحنولوگياسى بارلىق قارجىلاي قولداۋشىسىنان ايىرىلىپ قالادى. بۇل Huawei-گە قارا بۇلت ۇيىرىلگەنمەن بىردەي.

“The Qazaq Times”