بەلگىسىز حاكەرلەر ەو ەلدەرىنىڭ ديپلوماتيالىق حاتتارىن ۇرلاپ كەلگەن

باتىس اقپارات قۇرالدارىنىڭ كەشەگى حابارىنا قاراعاندا، بەلگىسىز حاكەرلەر توبى ەۋروپا وداعىنا مۇشە ەلدەرىنىڭ بايلانىس ارنالارىن تالقانداپ كىرىپ، ونداعى ديپلوماتيالىق حاتتاردى كوپ جىلدار بويى وقىپ، جاريالاپ كەلگەنى ءمالىم بولدى. حاكەرلەر جاعىنان اقش، رەسەي جانە قىتاي ساياساتى نەمەسە سول ەلدەردىڭ ليدەرلەرى تۋرالى جازىلعان حاتتار كوبىرەك ۇرلانعان.

اقش-تاعى The New York Times باسىلىمىنىڭ ايتۋىنشا، ديپلوماتيالىق حاتتاردىڭ ۇرلانىپ جاتقانىن كيبەر-قاۋىپسىزدىك قىزمەتىن اتقارىپ وتىرعان كومپانيا انىقتاپ شىققان. اتالعان كومپانيانىڭ مالىمەتىنە سۇيەنسەك، ۇرلانعان حاتتاردىڭ كوپ بولەگى رەسەي تۋرالى، ايتالىق پۋتين مەن ترامپتىڭ حەلسينكيدە وتكەن كەزدەسۋىنە قاتىستى حاتتار ەكەنىن ايتادى.

حاكەرلەر ۇرلاعان حاتتاردىڭ ەندى بىرقاتارى ەو ەلدەرىنىڭ لاۋازىمدى تۇلعالارى مەن قىتاي باسشىسى شي جينپيڭ اراسىنداعى حات-حابار، پىكىر الماسۋ، وي-پىكىر بولىسكەن ديپلوماتيالىق جازبالار. بۇل حاتتاردىڭ بىرىندە قىتاي باسشىسى ترامپتىڭ بەيجىڭگە قاراتقان ساۋدا سوعىسىن سىناپ، مىنەگەنى دە ايتىلادى.

امەريكالىق باسىلىم ەو ەلدەرىنىڭ ديپلوماتيالىق حاتتارىنا قول سالعان جەلى ۇرىلارىنىڭ جۇمىس ءتاسىلى قىتاي ارمياسىنىڭ كيبەر-شابۋىل تاسىلدەرىنە ۇقساپ كەتەتىنىن ايتادى. ەۋروپالىق ەلدەردىڭ بارىنشا قورعالعان ارنالارىنان حاتتاردى ۇرلاپ الىپ، ونى حاكەرلەر اشقان سايتتاردا جاريالاپ تۇرعان.

حاكەرلىك شابۋىلداردان الەم ەلدەرى، حالىقارالىق ۇيىمدار، ءتىپتى بىرىككەن ۇلتتار ۇيىمى دا زارداپ شەگىپ جاتقانى ايتىلادى.

“The Qazaq Times”