بەلگيادا ۇكىمەتتىك داعدارىس باستالدى

بەلگيادا ۇكىمەتتىك داعدارىس باستالدى.

ۇكىمەتتىك داعدارىسقا جەلتوقساندا ەل پرەمەر-ءمينيسترى شارل ميشەلدىڭ بۇۇ-نىڭ ميگراتسيا جونىندەگى عالامدىق كەلىسىمىن قولداۋى تۇرتكى بولدى. ۇكىمەتكە كىرەتىن «جاڭا فلاماند» پارتياسى اتالعان قۇجات ميگراتسيالىق جاعدايدى الەمدىك دەڭگەيدە شيەلەنىستىرىپ جىبەرەتىنىن ايتىپ، تۇبەگەيلى قارسىلىق بىلدىرگەن. وسىدان كەيىن مەملەكەتتىڭ جەتەكشى پارتيالارى ۇكىمەتكە سەنىمسىزدىك تانىتۋدى ۇسىنىپ، پرەمەر-مينيستر شارل ميشەل وتستاۆكاعا كەتتى.

وسى اپتادا پارلامەنت وتىرىسى ءوتىپ، قالعان پارتيالار دا شارل ميشەل كانديداتتىعىن قولداۋدان باس تارتتى. كورول فيليپپ پرەمەردىڭ وتستاۆكاسىن مامىر ايىندا وتەتىن پارلامەنتتىك سايلاۋدا بەلگىلى بولادى دەسە دە، پارتيالار قارسى بولدى.

10 جەلتوقساندا بۇۇ-دا وتكەن مەملەكەتارالىق كونفەرەنتسيا «قاۋىپسىز، تارتىپكە كەلتىرىلگەن ميگراتسيا جونىندەگى دۇنيەجۇزىلىك پاكتىنى» بەكىتتى. قۇجات بويىنشا اكتتە زاڭسىز ميگراتسياعا توسقاۋىل بولىپ، ميگرانتتاردى ينتەگراتسيالاۋ جانە تۋعان ەلىنە قايتا ورالۋعا جاعداي جاساۋ قاراستىرىلعان. بىراق، قۇجاتقا قول قويعان كەز كەلگەن مەملەكەت شارتتاردى ورىنداۋعا مىندەتتى بولمايدى. اتالعان پاكتىنى قابىلداۋعا اۋستريا، اۋستراليا، ۆەنگريا، پولشا، چەحيا، بولگاريا، ەستونيا جانە يزرايل مەملەكەتتەرى قارسى شىققان بولاتىن. ولاردىڭ ايتۋىنشا، «ەگەر قۇجات قابىلدانسا، الەمدە اراب ەلدەرى مەن افريكا تۇرعىندارى باستاعان زاڭسىز كەلىمسەكتەر ارتۋى مۇمكىن». بەلگيا ۇكىمەتى دە وسىنداي پىكىردە.

"The Qazaq Times"