فوتو: sputniknews.kz

قىرعىزستاندا ەۋرازيالىق وداق ەلدەرىنەن كەلگەن كولىكتەردىڭ قۇجاتتارىن زاڭسىز جولمەن جاساپ، باج سالىعىن تولەۋدەن قاشقان ءتورت ازامات تۇتقىندالدى. بۇل تۋرالى قىرعىز ەلىنىڭ ىشكى ىستەر دەپارتامەنتى مالىمدەپ وتىر.

كونتراباندالىق جولمەن كەلگەن كولىكتەردىڭ بارلىعى ارنايى زاڭ ەرەجەسىندەگى بەلگىلەنگەن جىلداردان ەسكى. قۇيتىرقى ارەكەتتەرى اشكەرە بولعان ءتورت ازاماتتىڭ تۇراعىنان 111 اۆتوكولىك تاركىلەندى. سونىمەن بىرگە، كوپتەگەن مەملەكەتتىك مورلەر جانە قۇجاتتاردىڭ جاساندى كوشىرمەسى تابىلعان.

قىرعىز ءتارتىپ ساقشىلارىنىڭ مالىمەتى بويىنشا زاڭسىز ساتىلىمعا شىعارىلاتىن اۆتوكولىكتەردىڭ قۇنى 100 ميلليون سومنان اسادى. قازىرگى تاڭدا اتالعان جاعدايعا بايلانىستى تەرگەۋ جۇمىستارى دا باستالعان.

تاعى ءبىر ايتا كەتەرلىك جايت، قۇجاتتاردىڭ بارلىعىن ارنايى تۇپنۇسقادان ايىرۋ قيىن. تەك، اۆتوكولىككە بەرىلەتىن زاڭدى قۇجاتتىڭ ساپاسى عانا بىردەن ايىرۋعا مۇمكىندىك بەرەدى ەكەن. بۇل ىسكە قاتىسى بار دەگەن كۇدىكپەن قىرعىز ەلىنىڭ ءتورت ازاماتى جانە شۋ-كەمىن ايماعىنىڭ قىزمەتكەرى جاۋاپقا تارتىلۋدا. قوماقتى قارجىدان تۇراتىن كاسىپكە وزگە قانداي لاۋازىمدى تۇلعالار مەن ازاماتتاردىڭ قاتىسى بار ەكەندىگى انىقتالۋ ۇستىندە.

نەگىزىنەن قىرعىز ەلىنە كىرگەن كولىكتەردىڭ كوبى شىعىس ەۋروپادان تاسمالدانعان. ساپاسى جاقسى، جۇرىسكە ىڭعايلى كولىكتەر قىرعىز ەلىنىڭ تۇرعىندارىنا بىردەن ۇنايتىندىعى ءسوزسىز.

ارنايى فوتوسالون رەتىندە اشىلعان جاسىرىن تسەح، بارلىق كولىكتەردىڭ قۇجاتتارىن راسىمدەيتىن ورىن بولعان. بىشكەك قالاسىندا ورنالاسقان قۇپيا ورىننىڭ قانداي جۇمىستارمەن اينالىسىپ جاتقانىمەن كوپتەگەن تۇرعىندار بەيحابار بولىپ شىقتى. وسىلايشا، سۋرەتتەردىڭ وڭدەپ، حالىققا شاعىن كاسىپتى ۇسىنعان ازاماتتار قوماقتا قاراجاتى بار جۇمىستاردى جاسىرىن تۇردە جاساپ كەلگەن.

“The Qazaq Times”