اقش پرەزيدەنتى دونالد ترامپتىڭ بۇرىنعى جەكە ادۆوكاتى 3 جىلعا سوتتالدى. مايكل كوەن كونگرەسسكە جالعان اقپارات بەردى، سايلاۋ كامپانياسىن قارجىلاندىرۋ جونىندەگى زاڭدى بۇزدى، سالىقتان جالتاردى دەپ ايىپتالدى.

تەرگەۋ مالىمەتى بويىنشا، كوەن ەكى ايەلگە ترامپپەن اشىنالىق قارىم-قاتىناسىن جاسىرۋ ءۇشىن 130 مىڭ دوللار پارا بەرۋ ىسىنە قاتىسقان. ەكىنشىدەن، ول كونگرەسسكە اقش پرەزيدەنتىنىڭ ماسكەۋدەگى قۇرىلىس جوباسى جونىندە جالعان اقپارات بەرگەن.

پروكۋرورلار اقش پرەزيدەنتى ايەلدەرگە اقشا بەرۋ جونىندە كوەنگە تىكەلەي ءوزى تاپسىرما بەرگەن دەپ ەسەپتەيدى. سونىمەن بىرگە مەملەكەتتىك ايىپتاۋشىلار ەكەۋى دە سايلاۋ كامپانياسىن قارجىلاندىرۋ جونىندەگى زاڭدى بۇزدى دەپ سانايدى. زاڭعا سايكەس تولەم جۇرگىزۋ اشىق بولۋى كەرەك ءارى ادام باسىنا 2700 دوللاردان اسپاۋى ءتيىس.

52 جاستاعى كوەن ەكى ايىپ بويىنشا دا كىناسىن مويىندادى.

دونالد ترامپ بولسا بۇل ىسكە قاتىستى ءوزىنىڭ ايىبىن مويىندامايدى. ونىڭ ادۆوكاتى رۋدي دجۋلياني ەكى ايەلگە اقشا تولەۋ بەدەلىن تۇسىرمەۋ ءۇشىن جۇمسالدى دەپ ەسەپتەيدى.

"The Qazaq Times"