يونحاپ: سولتۇستىك كورەيا باسشىسىنىڭ سەۋلگە جىل سوڭىنا دەيىن ساپارلاي كەلۋى وتە قيىن

سولتۇستىك كورەيا باسشىسى كيم جوڭ ۋن (Kim Jong Un/كيم چەن ىن) جىل سوڭىنا دەيىن وڭتۇستىك كورەيا استاناسى سەۋلگە رەسمي ساپارمەن بارا الماۋى مۇمكىن. مۇنداي مالىمەتتى وڭتۇستىك كورەيا پرەزيدەنت سارايىنا سىلتەمە جاساي وتىرىپ، سول ەلدىڭ «يونحاپ» اقپاراتتىق اگەنتتىگى حابارلادى.

اتالعان اقپارات اگەنتتىگى بۇگىن تاڭەرتەڭ وڭتۇستىك كورەيا پرەزيدەنت سارايى رەسمي وكىلىنىڭ سوزىنە سىلتەمە جاساپ: «كيم جوڭ ۋننىڭ جىل سوڭىنا دەيىن سەۋلگە ساپارلاي كەلۋى وتە قيىن، الايدا ول بولۋى مۇمكىن ساپارعا دايىندالىپ جاتىر»، – دەپ مالىمدەدى.

ەستەرىڭىزگە سالا كەتەيىك، قىركۇيەك ايىندا وڭتۇستىك جانە سولتۇستىك كورەيا باسشىلارى ەكى ەل شەكاراسىنداعى پانمىنجومدا كەزدەسكەن بولاتىن. سول رەتى وڭتۇستىك كورەيا پرەزيدەنتى ءمۇن جاين كورەي حالىقتىق دەموكراتيالىق رەسپۋبليكاسىنىڭ ەڭ جوعارى باسشىسى كيم جوڭ ۋندى جىل سوڭىنا دەيىن سەۋلگە رەسمي ساپارمەن كەلۋگە شاقىرعان ەدى. ءار، كيم جوڭ ۋن بۇل ۇسىنىستى قابىل العان بولاتىن.

حاباردا ايتىلۋىنشا، سولتۇستىك كورەيا مەن اقش اراسىنداعى يادرولىق ماسەلەگە بايلانىستى كەلىسسوزدەگى قيىندىقتار كيم جوڭ ۋننىڭ سەۋل ساپارىن بولدىرماۋى مۇمكىن.

2018 جىلى باستالعاننان بەرى كورەي تۇبەگى ماسەلەسىندە بەتبۇرىس پايدا بولدى. سولتۇستىك كورەيا بۇرىنعى قاسارىسقان پوزيتسياسىن جۇمسارتىپ، كەلىسسوز ۇستەلىنە كەلە الاتىنىن بايقاتتى. سولتۇستىك پەن وڭتۇستىك كورەيا اراسىندا جانە سولتۇستىك كورەيا مەن اقش اراسىندا ديالوگ ورناتىپ، قىتاي باسشىسىمەن دە بىرنەشە مارتە كەزدەسۋ وتكىزدى. ءتىپتى، اقش پرەزيدەنتى ترامپ پەن كيم جوڭ ۋن اراسىندا تاريحي كەزدەسۋ ءوتىپ، سولتۇستىك كورەيا يادرولىق قارۋدان باس تارتاتىنىن دا بىلدىرگەن ەدى.

الايدا، تاراپتار اراسىندا جوعارى دەڭگەيدەگى كەزدەسۋلەر مەن ديالوگتاردىڭ وتكىزىلگەنىنە قاراماستان اتالعان پروتسەسس جۇرت كۇتكەندەي جىلدام بولمادى. بۇعان كوپجاقتى سەبەپتەردى ايتۋعا بولادى. ايتالىق، اقش پەن سولتۇستىك كورەيا اراسىنداعى تۇسىنىستىك پەن سەنىمنىڭ ءالى دە جەتەرسىز ەكەنىن، تاراپتاردىڭ ءبىر-بىرىنە دەگەن ساياساتى كەلىسسوزدەردىڭ جۇزەگە اسۋىنا قيىندىقتار تۋدىرىپ وتىرعانىن اڭعارتتى.

“The Qazaq Times”