مىسىر بيلىگى فرانتسياداعى «سارى جيلەت» شەرۋىنە بايلانىستى جارىق بەرۋشى سارى جيلەتتەردى ساتۋعا تىيىم سالدى. اتالعان شەشىم 1981 جىلدان بەرى ەل باسقارعان حۇسني مۇباراكتى 2011 جىلى بيلىك باسىنان الىپ تاستاۋ شەرۋىنىڭ ۋاقىتىنا قاراي شىعارىلعان.

قازىرگى تاڭدا بارلىق ساۋدا ورىندارىنا بيلىكتىڭ جاڭا تالابى ەسكەرتىلدى. سونداي-اق كوتەرمە ساتىپ الۋلار تەك، پوليتسيا قىزمەتكەرلەرىنىڭ رۇقساتىمەن عانا جۇزەگە اسىرىلماق.

2011 جىلدىڭ 25 قاڭتارىندا مىسىر ەلىندەگى تۇرعىندار جاپپاي نارازىلىق شەرۋگە شىعىپ، ناتيجەسىندە 11 اقپان كۇنى ەلدىڭ ەكس-پرەزيدەنتى حۇسني مۇباراك وتىز جىلدىق بيلىگىنەن كەيىن تاعىنان كەتكەن بولاتىن. ال، 2012 جىلدىڭ 30 ماۋسىمىندا مۇحاممەد ءمۇرسي انت قابىلداپ، ەلدىڭ جاڭا پرەزيدەنتى اتاندى. بۇدان كەيىن، 2013 جىلدىڭ 3 شىلدەسىندە اسكەري توڭكەرىس باستالىپ، بيلىك باس شتاب باسشىسى ابدۋل-فاتتاح اس-ءسيسيدىڭ قولىنا وتكەن ەدى.

ەستەرىڭىزگە سالا كەتەيىك، 17 قاراشادان باستاپ فرانتسيا ەلىندە جانارماي سالىعىنىڭ قىمباتتاۋىنا بايلانىستى حالىق جاپپاي نارازىلىق شەرۋگە شىعۋدا. بيلىكتىڭ جاڭا زاڭىنا قارسى شىققان 135 مىڭنان استام تۇرعىننىڭ ۇشەۋى قازا تاۋىپ، 1043 ادام ءتۇرلى دەنە جاراقاتىن العان. ونىڭ ىشىندەگى 222-ءى قاۋىپسىزدىك كۇشتەرىنىڭ قىزمەتكەرلەرى.

فرانتسيا ەلى جاپپاي كوتەرىلگەنىنەن كەيىن، پرەزيدەنتى ەممانۋەل ماكرون سالىقتىڭ وسپەيتىندىگىن، زەينەتكەرلەردىڭ ايلىق ەسەبى وسەتىندىگىن مالىمدەگەن ەدى. الايدا، شەرۋ ءالى كۇنگە دەيىن جالعاسىپ كەلەدى.

“The Qazaq Times”