ۋكراينا رەسەيمەن اراداعى دوستىق تۋرالى كەلىسىمدى توقتاتپاق. 

بۇگىن ۋكراينا پرەزيدەنتى پەتر پوروشەنكو رەسەيمەن اراداعى دوستىق كەلىسىمنەن شىعۋ تۋرالى زاڭعا قول قويدى. پوروشەنكو ءوز سوزىندە رەسەيدەن ۇزاققا سوزىلعان قارۋلى قاقتىعىستان سالدارىنان بولعان شىعىنداردى ءوندىرىپ الۋ ءۇشىن شاعىمدانۋ جۇمىستارىن جۇزەگە اسىراتىن ۆەدومستۆوارالىق ورگان قۇرۋدى قاراستىرامىز دەدى. سونداي-اق، «رەسەيمەن كەلىسىمنەن شىعۋ – وتارلىقتان قۇتىلىپ، ەۋروپاعا بەت الۋ ستراتەگيامىزدىڭ ءبىر بولىگى» ەكەندىگىن باسا ايتتى.

رەسەي – ۋكراينا دوستىق شارتىنا 1997 جىلى 31 مامىردا قول قويىلعان. شارت مەرزىمى 2007 جىلى تاعى دا 10 جىلعا سوزىلعان. قۇجاتتا ديپلوماتيالىق بايلانىس، ءوز اۋماعى ءۇشىن ءبىر-ءبىرىنىڭ قاۋىپسىزدىگىنە نۇقسان كەلتىرمەۋ جانە شەكارا مەن اۋماقتىق تۇتاستىقتى قۇرمەتتەۋى قاعيدالارى جازىلعان.

2013 جىلى ەۋرومايدان دەپ اتالعان جاپپاي حالىق تولقۋىنا قاتىسقاندار ۋكراينانىڭ ەۋروپا وداعىنا قوسىلۋىن تالاپ ەتكەن. سونداي-اق ۋكراينانىڭ ۇلتشىلدار ۇيىمى (وۋن) رەسەيدەن ىرگەنى اۋلاق ۇستاپ، ەۋروپوتسەنتريزمگە بەت الۋ كەرەكتىگىن بىرنەشە رەت ەسكەرتكەن.

23 قاراشادا ەۋروپالىق وداققا قوسىلۋ تۋرالى زاڭ جوباسىن پرەزيدەنت پەتر پوروشەنكو ۇسىنىپ، ۋكراينانىڭ كونستيتۋتسيالىق سوتى بۇل شەشىمدى ماقۇلداعان بولاتىن. پوروشەنكو مەملەكەتتىڭ 2030 جىلعا دەيىن بارلىق سالادا تاس-ءتۇيىن دايىن بولاتىندىعىن ايتتى. وسىعان دەيىن ناتو-نىڭ پارلامەنتتىك اسسامبلەياسى «اگرەسسورلىق رەسەيدىڭ قاۋىپ-قاتەرىنە قارسى تۇرۋ ءۇشىن» ۋكراينانى اليانسقا قوسۋدى تالقىلاعان.

"The Qazaq Times"