گرۋزيا پرەزيدەنتى سالومە زۋرابيشۆيلي. فوتو: cdnvideo

رەسەي اگرەسسيالىق ساياساتىن گرۋزياعا قارسى پايدالانباقشى. بۇل تۋرالى گرۋزيانىڭ جاڭادان سايلانعان پرەزيدەنتى سالومە زۋرابيشۆيلي «Financial Times» باسىلىمىنا حابارلادى.

زۋرابيشۆيلي گرۋزيا بولاشاعى ءۇشىن ەۋروپالىق وداق ەلدەرىنىڭ كومەگى اۋاداي قاجەت دەيدى. سونىمەن قاتار، ول ءوزىنىڭ سۇحباتىندا رەسەيدىڭ اگرەسسيالىق ساياساتى ۋاقىت وتكەن سايىن كۇش الىپ، ۋكراينا عانا ەمەس، گرۋزياعا دا قارسى باعىتتالعانىن اتاپ ءوتتى. سۇحباتتا: «بۇل كۇنگە جەتۋ ءۇشىن تالاي عاسىر قاجەت بولدى. بىراق، ەندى اتا-اجەلەرىمنىڭ ارمان-ماقساتتارىنىڭ ورىندالعانىن كورىپ وتىرمىن. 26 قاراشادا گرۋزيانىڭ تۇڭعىش ايەل پرەزيدەنتى لاۋازىمىنا يە بولدىم. كەڭەستىك كەزەڭنىڭ وزىندە ايقىن دەموكراتيا ورىن الادى دەگەن ۇمىتتە بولدىق. بۇل ءساتتىڭ ءوزى ەرەن ەڭبەكپەن كەلدى. وسى رەتتە اقش پەن ەۋروپا ەلدەرىنىڭ بىزگە ىقپالىن، كومەگىن ايتىپ كەتكەنىمىز ءجون»،– دەلىنگەن.

«مەن العاش ديپلومات اتانعان كەزىمدە، 1970 جىلدارى قىرعي-قاباق سوعىس جالعاسىپ جاتقان ەدى. سول ۋاقىتتاعى سوعىس بۇگىنگە دەيىن توقتاعان جوق. مەن ونى رەسەيدىڭ ءار قادامىن، ساياساتتاعى باعىتىن اڭدىعان سايىن بايقاپ وتىرمىن. قازىرگى الەمدە ورىن الىپ جاتقان جاعدايلار وسى مەملەكەتتىڭ ارەكەتتەرىنە تىكەلەي بايلانىستى. مەن ءوز حالقىمدى رەسەيلىك كوزقاراس پەن سوققىدان ساقتاۋ ءۇشىن جانە ەركىندىك، دەموكراتيا ورناتۋ ءۇشىن بارىمدى سالاتىن بولامىن!»،– دەدى.

ەستەرىڭىزگە سالايىق، گرۋزياداعى پرەزيدەنت سايلاۋىندا سالومە زۋرابيۆشيلي قارسىلاسى گريگول ۆاشادزەنى 20 پايىز داۋىس ايىرماشىلىعىمەن جەڭگەن. گرۋزيا تاريحىندا ءبىرىنشى رەت ايەل پرەزيدەنت اتانعان ول سايلاۋداعى جەڭىسىن «ەۋروپا جەڭىسى» دەپ اتادى. سايلاۋ اياقتالعاننان كەيىن، ۆۆس-گە سۇحبات بەرگەن زۋرابيشۆيلي رەسەيدى گرۋزيا تەرريتورياسىنا بىرتىندەپ ەنىپ، «وككۋپاتسيا سىزىعىنداعى» ازاماتتاردى ۇرلادى دەپ ايىپتادى. جانە ءوز ەلىنىڭ ەۋروپالىق باعىتتى ۇستانىپ، ەۋروپاعا قاراي بوي تۇزەيتىنىن جەتكىزدى.

"The Qazaq Times"