مەملەكەتتىك سىيلىقتىڭ يەگەرلەرىنىڭ ەسىمدەرى جاريالاندى. فوتو: قازاقستان رەسپۋبليكاسىنىڭ پرەمەر‑مينيسترى.

قر پرەزيدەنتى ن. نازارباەۆتىڭ 28 قاراشاداعى № 794 جارلىعىمەن بەكىتىلگەن ادەبيەت پەن ونەر سالاسىندا قر مەملەكەتتىك سىيلىعىن العانداردىڭ ەسىمدەرى جاريالاندى. بۇل تۋرالى اقوردانىڭ رەسمي سايتى مالىمدەدى.

2018 جىلعى مەملەكەتتىك سىيلىق 3 جەكە قالامگەرگە جانە 2 شىعارماشىلىق ۇجىمعا بەرىلگەن. سولاردىڭ اراسىندا قازاق پوەزياسىنىڭ دامۋىنا ايرىقشا ۇلەس قوسقان تىنىشتىقبەك ابدىكاكىمۇلى جانە نازىك تە مارتەبەلى پوەزيا وكىلى اقۇشتاپ باقتىگەرەيقىزى قاتارلى اقىندار دا بار.

پرەزيدەنت جارلىعىندا:

  1. قازاقستان رەسپۋبليكاسىنىڭ 2018 جىلعى ادەبيەت پەن ونەر سالاسىنداعى مەملەكەتتىك سىيلىعى:

1) اقىن تىنىشتىقبەك ابدىكاكىموۆكە – «القوڭىر دۇنيە» ولەڭدەر مەن باللادالار  جيناعى ءۇشىن;
2) اۆتورلار ۇجىمىنا: تولەۋبەك نىعمەتۇلى الپيەۆكە، الان اسقارۇلى بورىباەۆقا، سۇندەت ءابدىراحمانۇلى بايعوجينگە، «استانا وپەرا» مەملەكەتتىك وپەرا جانە بالەت تەاترى» كوممەرتسيالىق ەمەس اكتسيونەرلىك قوعامىنىڭ شىعارماشىلىق ۇجىمىنا قاتىسۋشىلارعا – «اباي» وپەراسى (ل. حاميدي، ا. جۇبانوۆ) ءۇشىن;
3) اۆتورلار ۇجىمىنا: اقان قارعامبايۇلى ساتاەۆقا، ءاليا نۇرسۇلتانقىزى نازارباەۆاعا، تيمۋر قازبەكۇلى جاقسىلىقوۆقا، التىناي باۋىرجانقىزى نوگەربەككە، ءادىل ەرالىۇلى احمەتوۆكە – «اناعا اپارار جول» تولىقمەترلى كوركەم ءفيلمى ءۇشىن;
4) اقىن اقۇشتاپ باقتىگەرەيقىزى باقتىگەرەەۆاعا – «انا سىرى» ولەڭدەر مەن باللادالار جيناعى ءۇشىن;
5) اقىن وتەگەن ورالبايۇلى ورالباەۆقا – «شۋاقتى شاق» جىر جيناعى ءۇشىن بەرىلسىن.

  1. وسى جارلىق رەسمي جاريالانعان كۇنىنەن باستاپ قولدانىسقا ەنگىزىلەدى»، – دەلىنگەن.

“The Qazaq Times”