اقش-تىڭ يران جونىندەگى ارنايى وكىلى برايان حۋك. فوتو: thepeninsulaqatar.com

اقش ەۋروپالىق وداققا يرانعا قارسى سانكتسيا ەنگىزۋ تۋرالى ۇسىنىس ايتتى.

ۋاشينگتون تاراپى يراننىڭ زىمىران سىناعىن وتكىزۋىنە جانە يادرولىق قارۋعا قاتىستى شارتتى بۇزۋىنا بايلانىستى قاتاڭ قاۋلى ەنگىزۋ كەرەك دەيدى. سەبەبى، بۇل زىمىراندار قورعانىس ەمەس، مەملەكەتتەر اراسىنداعى قاقتىعىستار مەن شابۋىلداۋعا ارنالعان. اقش-تىڭ يران ءىسى جونىندەگى ارنايى وكىلى برايان حۋك: «باسقا ەلدەر يرانمەن يادرولىق كەلىسىمدى ورىنداي بەرۋگە ەرىكتى. وزگە مەملەكەتتەر مەن ۇيىمداردى تەھرانعا قارسى سانكتسيا سالۋعا شاقىرۋ قيىن. دەگەنمەن، بۇل قۇجات يراننان تونگەن وزگە قاۋىپتەرگە جاۋاپ بەرمەيدى. تەك بالليستيكالىق زىمىرانداردى سىناقتان وتكىزۋىنە قارسى تۇرۋ كەرەك»، – دەدى.

تەھراننىڭ بۇۇ قاۋىپسىزدىك كەڭەسىنىڭ قارارىنا قايشى ارەكەتتەرىنە قۇراما شتاتتارى عانا ەمەس، فرانتسيا دا الاڭداۋشىلىق ءبىلدىردى. بىراق، يران بۇل ايىپتاردى جوققا شىعارىپ، سىناقتاردى توقتاتپايتىنىن ايتتى.

"The Qazaq Times"