ترامپ پەن شي جينپيڭ اس ۇستىندە كەڭەستى. فوتو: VOA.

اقش پەن قىتاي باسشىلارىنىڭ ارگەنتينادا وتكەن G20 ءسامميتى بارىسىنداعى ارەدىك كەزدەسۋلەردە جانە تۇسكى اس كەزىندە نەلەر جايىندا كەڭەستى؟ كوپتەگەن اقپارات قۇرالدارىنىڭ وكىلدەرى مەن وزگەدە ادامدار  قىتايدىڭ اقش-تاعى ەلشىلىگىنىڭ WeChat جەلىسىندەگى پاراقشاسىنا پىكىرلەرى مەن سۇراقتارىن قالدىردى. الايدا، بۇل پىكىرلەر مەن سۇراقتار الەۋمەتتىك پاراقشانى باسقارۋشى جاعىنان وشىرىلگەن نەمەسە بۇعاتتالعان.

قۇراما شتاتتاعى كەيبىر باسىلىمدار اقپارات كوزدەرىنە سىلتەمە جاساي وتىرىپ، ترامپ پەن شي جينپيڭ كەزدەسۋدە ساۋدا داۋىنان تىس تاقىرىپتار دا ءسوز بولعانىن العا تارتادى. ال، اقش-تىڭ قىتايداعى ەلشىلىگى سول ەلدەگى WeChat جەلىسىندەگى پاراقشاسى ارقىلى اتالعان كەزدەسۋ تۋرالى مالىمەت تاراتتى. بۇل مالىمەتتە، ەكى ەل باسشىسىنىڭ ساۋدا داۋىن شەشۋ تۋرالى كەلىسكەنى تۋرالى ايتىلعان. الايدا، Bloomberg اگەنتتىگىنىڭ حابارىندا ايتىلعانداي وزگە مازمۇندار تۋرالى ەشقانداي مالىمەت بەرمەگەن.

قۇراما شتاتتاعى قىتاي ەلشىلىگى «ترامپ-شي» اراسىنداعى كەزدەسۋىنە قاتىستى مالىمەت بەرۋدەن جالتارعان سايىن، اقش پەن وزگە دە باتىس ەلدەرىنىڭ اقپارات قۇرالدارى قادالا ءتۇستى. ولار بۇنىمەن ۇقساس ۋاقىتتا ۇلكەن بۋشتىڭ قازاسى تۋرالى ءتۇرلى كوزقاراستار مەن پىكىرلەردىڭ بۇعاتتاۋعا ۇشىراماعانىن العا تارتۋدا.

بىرقاتار اقپارات اگەنتتىكتەرىنىڭ حابارلاعانىنداي، ترامپ پەن شي جينپيڭ اراسىندا ساۋدا كەلىسىمدەرىنەن تىس تاقىرىپتار دا ءسوز بولعان بولۋى مۇمكىن. الايدا، رەسمي تاراپتىڭ بۇل تۋرالى مالىمەت بەرۋگە نيەتى جوق.  جالپى ارگەنتيناداعى كەزدەسۋدىڭ مازمۇنى تۋرالى ەكى ەلدىڭ اقپارات قۇرالدارىندا ەكى ءتۇرلى حابارلاندى. قىتاي رەسمي اقپارات قۇرالدارى كەلىسىمنىڭ كەيبىر ماڭىزدى مازمۇندارىن جاسىرىپ قالدى. بۇنىڭ ءوزى دە كوپ نارسەنى ۇعىندىراتىنداي. قۇراما شتاتپەن بولعان  ساۋدا قايشىلىعى قىتايدىڭ ەكونوميكاسىمەن قاتار الەۋمەتتىك پىكىرلەرىنە دە ءوز اسەرىن تيگىزدى. سوندىقتان دا، بەيجىڭ بيلىگى قوعامدىق پىكىرلەردىڭ قىسىمىن ەسكەرۋسىز قالدىرا المايدى.

“The Qazaq Times”