ترامپ پۋتينمەن كەزدەسۋدەن باس تارتتى

اقش پرەزيدەنتى دونالد ترامپ  G20 سامميتىندە رەسەي پرەزيدەنتى ۆلاديمير پۋتينمەن كەزدەسۋدەن باس تارتتى.

ترامپ بۇل شەشىمىنە قارا تەڭىزدە رەسەيدىڭ ۋكراينالىق كەمەلەردى باسىپ الىپ، تەڭىزشىلەرىن تۇتقىنداپ، جىبەرمەي وتىرعانى سەبەپ بولعانىن حابارلادى. ال كرەمل ترامپ رەسمي تۇردە كەزدەسۋدەن باس تارتقان جوق ەكەندىگىن ايتىپ، قانداي دا ءبىر تۇسىنىك بەرۋدەن باس تارتىپ وتىر. وسىعان دەيىن اق ءۇيدىڭ ءباسپاسوز حاتشىسى سارا ساندەرس ترامپ پەن پۋتين اپتا سوڭىندا بۋەنوس-ايرەس قالاسىندا وتەتىن G-20 ءسامميتى اياسىندا كەزدەسەتىنىن ايتقان. ساياسي ماڭىزدى جيىندا ەكى ەل باسشىسى ۋكراينا مەن سۇرياداعى جاعداي، يادرولىق قارۋ ماسەلەلەرىن تالقىلاۋدى جوسپارلاعان. بۇل وقيعاعا قاتىستى دونالد ترامپ «Washington Post» گازەتىنە بەرگەن سۇحباتىندا كەرچ بۇعازىنداعى وقيعا تۋرالى ۇلتتىق قاۋىپسىزدىك كەڭەسىنىڭ تولىق ەسەبىن كۇتەتىنىن مالىمدەدى. ءوز سوزىندە ول: «مۇمكىن، مەن بۇل كەزدەسۋدى وتكىزبەيمىن. ماعان رەسەي اگرەسسياسى مۇلدە ۇنامايدى»، – دەپ مالىمدەدى.

جالپى كيەۆ پەن ماسكەۋ تەكەتىرەسىنەن سوڭ اقش، ناتو جانە ەو ەلدەرى تاراپىنان رەسەي سىن استىندا قالدى. اقش مەملەكەتتىك دەپارتامەنتىنىڭ وكىلى حيزەر نويەرت ءوز مالىمدەمەسىندە: «اقش ۋكراينانى قولدايدى. ءبىز باسقا ەلدەردىڭ دە وسى ساياساتتى ۇستانعانىن قالايمىز. ۇلتتىق قاۋىپسىزدىك ستراتەگيامىزدا كورسەتىلگەندەي، الەم ەلدەرىنىڭ ءبىر-بىرىنە قولداۋ ءبىلدىرۋى مىندەت. وسى رەتتە ەۋروپا ەلدەرىن «سولتۇستىك اعىن – 2» قۇبىرى جوباسىنان باس  تارتۋعا شاقىرامىز. سەبەبى، بۇل جوبا رەسەي مۇددەسى مەن ەكونوميكاسىنا كومەكتەسەدى»، – دەدى.

ايتا كەتەيىك، 25 قاراشادا رەسەي كەرچ بۇعازىندا ۋكراينا اسكەري-تەڭىز كۇشتەرىنىڭ ءۇش كەمەسىن باسىپ الىپ، وق اتقان. ۋكراينا پرەزيدەنتى پەتر پوروشەنكو رەسەيدىڭ بۇل ارەكەتىن «باسقىنشىلىق» دەپ اتاپ، ولاردان ازوۆ تەڭىزىندە ۇستالعان ۋكراينا اسكەري كەمەلەرى مەن تەڭىزشىلەرىن دەرەۋ بوساتۋدى تالاپ ەتتى.

"The Qazaq Times"