فوتو: zagran.guru

ۇلىبريتانيا مەكتەپتەرىنىڭ بىرىندە سۇريالىق بوسقىن قىزعا قىسىم كورسەتىلدى. وسىدان ءبىراز ۋاقىت بۇرىن ونىڭ اعاسى 16 جاسار جامال دا اتالعان جاعدايدى باستان وتكەرگەندىگى  تۋرالى بەينەروليك جارىققا شىققان بولاتىن.

قازىرگى تاڭدا سۇريالىق قىزدى ءبىر توپ وقۋشىلاردىڭ قۇلاتقانى تۇسىرىلگەن بەينەروليك الەۋمەتتىك جەلىلەردە كەڭىنەن تارالۋدا. كوپتەگەن ادامدار بۇل ارەكەتتىڭ دۇرىس ەمەستىگىن ايتىپ، ءوز نارازىلىعىن بىلدىرگەن. الايدا، جەرگىلىكتى پوليتسيا وكىلدەرى ەشقانداي شاعىمنىڭ كەلىپ تۇسپەگەندىگىن مالىمدەدى. ايتسە دە، كوپشىلىككە تەز تارالعان بەينەروليك ارقىلى تەرگەۋ جۇمىستارىنىڭ باستالىپ كەتكەندىگى تۋرالى حابارلاعان.

العاشقى بەينەروليكتە 16 جاستاعى جامالعا بريتان ستۋدەنتتەرىنىڭ شابۋىل جاساعاندىعى انىق كورسەتىلگەن. تەز ارادا تەرگەۋ جۇمىستارىن باستاعان قۇقىق قورعاۋ ورىندارى بىردەن بۇزاقىلاردى انىقتاپ، سوت زالىنان بىراق شىعارعان. بۇدان كەيىن ITV تەلەارناسىنا سۇحبات بەرگەن جامال بريتان جەرىنەن دە قاۋىپسىز ورىندى تابا الماعاندىعىن اشىق ايتتى. تەك، مەكتەپتە عانا ەمەس، دۇكەنگە بارار جولدا دا ۇرەيلەنەتىن ءجاسوسپىرىم ساباق وقۋعا دەگەن سەنىمنىڭ جوعالىپ بارا جاتقاندىعىن جەتكىزگەن.

بۇۇ-نىڭ بوسقىندار باعدارلاماسى بويىنشا ۇلىبريتانياعا كەلگەن جاسوسپىرىمدەر، العاشقى كۇننەن باستاپ قىسىمنىڭ استىندا قالعان.  بۇدان بۇرىن دا بىرنەشە رەت پولتسيا قىزمەتكەرلەرىنىڭ كومەگىنە جۇگىنگەن جامال، ودان پايدا بولماعانىن ايتتى. بريتانيادا جاقسى ءومىر، جاقسى مەكتەپتىڭ كۇتىپ تۇرعانىن ارمانداعان بالالار، ەندى ونىڭ ءجاي عانا ارمان ەكەندىگىنە كوزدەرى جەتكەندەي.

2011 جىلى ءسۇريا ەلىندەگى بەيبىت شەرۋشىلەر مەن بيلىك وكىلدەرىنىڭ اراسىنداعى قاقتىعىس، كەيىننەن وق اتۋعا دەيىن جەتكەن. وسىلايشا، بۇۇ-نىڭ مالىمەتى بويىنشا 400 مىڭنان استام ادام قۇربان بولىپ، 100 ملن-عا جۋىق تۇرعىن ۇيلەرىن تاستاپ كەتتى. ال، 4,8 ملن ادام وزگە ەلدەردەن پانا تاپقان.

ۇلىبريتانياداعى مەكتەپ وقۋشىلارىنىڭ سۇريالىق جاسوسپىرىمدەرگە جاساعان قىسىمىن قاراپ وتىرىپ، وزگە ەلدەردەگى بوسقىنداردىڭ دا الاڭسىز كۇن كەشىپ جاتپاعاندىعىن اڭعارۋعا بولادى. دەسە دە تىنىش ءومىر ءسۇرۋدى قالاعان ءسۇريا ازاماتتارى تۇركيا ارقىلى ەۋروپاعا ءوتىپ كەتۋ ارەكەتىن جالعاستىرىپ كەلەدى.

"The Qazaq Times"