قىرعىز دەپۋتاتى جاعىمسىز جاڭالىقتاردى ورىس جانە اعىلشىن تىلدەرىندە شىعارماۋ كەرەكتىگىن ۇسىندى

قىرعىز ەلىنىڭ پارلامەنت دەپۋتاتى اقىلبەك جاپاروۆ جاعىمسىز جاڭالىقتاردى ورىس جانە اعىلشىن تىلىندە جارىققا شىعارماۋدى ۇسىندى. 

«گرۋزيا ەلىندە بولعان ۋاقىتتا، جاعىمسىز جاڭالىقتاردى ورىس تىلىندە سايتقا شىعارمايتىنىن اڭعاردىم. 2004 جىلى گرۋزيا باسشىسى بارلىق حالىققا جاعىمسىز جاڭالىقتاردى تەك، گرۋزين تىلىندە جازۋعا شاقىرعان. ال، ورىس ءتىلى مەن اعىلشىن تىلىندە جاقسى جاڭالىقتار جازىلۋى ءتيىس دەگەن».

سونداي-اق جاپپاروۆ مادەنيەت، اقپارات جانە تۋريزم ءمينيسترى ازامات جامانقۇلوۆقا دا ۇسىنىس ءبىلدىردى. «سىزدەر دە حالىققا وسىنداي ۇسىنىس جاساۋلارىڭىز ءتيىس. عالامتور بەتىندە قىرعىز ەلىنىڭ سالت-داستۇرلەرى تۋرالى تەك جاعىمدى جاڭالىقتار بولۋى ءتيىس» دەپ ءوزىنىڭ پىكىرىن ورتاعا سالدى.

الايدا، قىرعىز جۇرتشىلىعىنىڭ بارلىعى بىردەي قىرعىزشا بىلە بەرمەيدى. ءتىپتى، بالاباقشالاردىڭ وزىندە دە قىرعىز ءتىلىن وقىتۋ كۇن ارتقان سايىن قيىنداپ بارادى. قازىرگى تاڭدا بىشكەك قالاسىندا 85 ءمۋنيتسيپالدى بالاباقشا بار. ونىڭ تەك، 13-ءى عانا تازا قىرعىز تىلىندە جۇمىس ىستەسە، 45 بالاباقشانىڭ جەتكىنشەكتەرى قىرعىز تىلىندە دە، ورىس تىلىندە دە ەركىن سويلەسۋى قاراستىرىلعان.

ەستەرىڭىزگە سالا كەتەيىك، گرۋزيانىڭ ەكس-پرەزيدەنتى ميحايل سااكاشۆيلي 2004 جىلى اتالعان ۇسىنىستى جۇزەگە اسىرعان. قازىرگى تاڭدا گرۋزيا باسىلىمدارىنان سول ۋاقىتتا سااكاشۆيلي تۋرالى جاعىمسىز شىققان ورىس تىلىندەگى اقپاراتتاردى كەزدەستىرۋ قيىن.

"The Qazaq Times"