ءدىن تاقىرىبىن كوتەرگەن جۋرناليستەر ماراپاتتالدى

27 قاراشادا الماتى قالاسى پروكۋراتۋراسىنىڭ باستاماسىمەن ۇلتتىق جۋرناليستىك زەرتتەۋ ورتالىعى ۇيىمداستىرعان ءدىن سالاسىنداعى وزەكتى ماسەلەلەرگە بايلانىستى بىرنەشە نوميناتسيالار بويىنشا جۋرناليستەر اراسىنداعى ۇزدىك ماتەريالدار بايقاۋى قورىتىندىلاندى. «قوعامدىق كەلىسىم» سارايىنىڭ ءباسپاسوز ورتالىعىندا وتكەن ءىس-شارادا ەڭ ۇزدىك دەگەن جۋرناليستەر ديپلوم جانە اقشالاي سىيلىقتارمەن ماراپاتتالدى.

ءدىن سالاسىنداعى وزەكتى ماسەلەلەرگە بايلانىستى جۋرناليستەر بايقاۋىنا 2018 جىلدىڭ 1 قاڭتارى مەن 25 قاراشا ارالىعىندا بۇقارالىق اقپارات قۇرالدارىندا جاريالانعان  ماتەريالدار قابىلداندى. ۇزدىك شىعارمالار جالپى جۇلدە قورى 1 000 000 تەڭگەلىك 9 نوميناتسيا جانە 5 ىنتالاندىرۋ سىيلىعى بويىنشا سارالاندى.

بۇل بايقاۋدىڭ نەگىزگى ماقساتى – قازاقستان رەسپۋبليكاسى جۇرتشىلىعىنىڭ نازارىن ءدىن سالاسىنداعى مەملەكەتتىك ساياساتتىڭ وزەكتى ماسەلەلەرىنە اۋدارۋ، باق ارقىلى تۇرعىنداردى مەملەكەتتىك ساياساتتىڭ ءدىن سالاسىنداعى ءار ءتۇرلى قۇندىلىقتارىنىڭ ساقتالۋىنا باعىتتالعان ماڭىزدى ءىس-شارالار جونىندە حاباردار ەتۋ، ءدىن سالاسىنداعى وزەكتى ماسەلەلەر بويىنشا ماتەريالداردى جاريالايتىن جۋرناليستەردى قولداۋ.

ۇزدىك شىعارمالار بايقاۋىنا 54 جۋرناليستەن جالپى 120-دان استام ماتەريال كەلىپ تۇسكەن. «ولاردىڭ بارلىعى دەرلىك «سەن تۇر، مەن اتايىن» دەگەن دۇنيەلەر» دەيدى ۇيىمداستىرۋشىلار.

قازىلار القاسىنىڭ توراعاسى بەلگىلى كوسەمسوزگەر، عالىم، ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ دەكانى ساعاتبەك مەدەۋبەكۇلى ءدىني ەكسترەميزم سەكىلدى ەلدىك مەن تەڭدىك مۇددەگە نۇقسان كەلتىرەتىن قاۋىپتىڭ الدىن الۋدا جۋرناليستەردىڭ ەڭبەگى ۇشان-تەڭىز ەكەنىن اتاپ ءوتتى. «بۇل بايقاۋعا كەلىپ تۇسكەن شىعارمالارعا قاراپ، جۋرناليستيكانىڭ ۇيىمداستىرۋشىلىق، اعارتۋشىلىق قۇندىلىقتارىنا تاعى دا كوزىمىز انىق جەتتى» دەگەن ساعاتبەك مەدەۋبەكۇلى تاڭداۋ جاساۋدىڭ وڭاي بولماعانىن جەتكىزدى. ال الماتى قالاسى پروكۋرارىنىڭ ورىنباسارى بەرىك اداموۆ ءوز سوزىندە «مەملەكەت ىرگەتاسىن نىعايتۋداعى جۋرناليستەردىڭ ەڭبەگىنە» توقتالىپ، «ءتورتىنشى بيلىك» وكىلدەرىنىڭ قىزمەتىنە ريزاشىلىعىن ءبىلدىردى.

الماتى قالاسى ءدىن ىستەرى باسقارماسى ءدىني بىرلەستىكتەرمەن جۇمىس جونىندەگى ءبولىم باسشىسى ەرعالي كوشەكەەۆ جۋرناليستەردىڭ ەڭبەگىن باعالاۋدا وسىنداي بايقاۋلاردىڭ ۇلەسى زور ەكەندىگىن جەتكىزدى. سونداي-اق، بايقاۋعا قاتىستى ءوز پىكىرىن ايتقان «زاڭ» مەديا-كورپوراتسياسى» جشس پرەزيدەنتى دوسىمبەك وتەعاليەۆ «الماتى قالاسى پروكۋراتۋراسىنىڭ جاقسى باستاماسى وزگە دە مەملەكەتتىك مەكەمەلەرگە ۇلگى بولىپ، مۇنداي قولداۋلار ءجيى جالعاسىپ تۇرسا» دەدى.

بايقاۋ قورىتىندىسىنا سايكەس، «مەرزىمدى باسىلىمدارداعى قازاق تىلىندەگى ەڭ ۇزدىك ماقالا» نوميناتسياسىن «زاڭ» گازەتى باس رەداكتورىنىڭ ورىنباسارى ساكەن قالدىباەۆ، «مەرزىمدى باسىلىمدارداعى ورىس تىلىندەگى ەڭ ۇزدىك ماقالا» نوميناتسياسىن «Central Asia Monitor» رەسپۋبليكالىق قوعامدىق-ساياسي گازەتىنىڭ ءتىلشىسى  ساۋلە يساباەۆا، «ينتەرنەت جەلىسىندەگى قازاق تىلىندەگى ەڭ ۇزدىك ماقالا» نوميناتسياسىن جۋرناليست سەيسەن امىربەكۇلى، «ينتەرنەت جەلىسىندەگى ورىس تىلىندەگى ەڭ ۇزدىك ماقالا» نوميناتسياسىن «www.sputniknews.kz» جەلىلىك باسىلىمىنىڭ ءتىلشىسى الەكساندر ميروگلوۆ، «ۇزدىك تەلەۆيزيالىق باعدارلاما» نوميناتسياسىن «ازاتتىق» راديوسى «ورتالىق ازيا جاڭالىقتارى» جوباسىنىڭ رەداكتورى، باعدارلاما پروديۋسەرى جۇلدىز تولەۋ، «ەڭ بەلسەندى بلوگەر» نوميناتسياسى حالىقارالىق «قازاقستان زامان» گازەتى باس رەداكتورىنىڭ ورىنباسارى باۋىرجان كاريپوۆ، «ۇزدىك الەۋمەتتىك بەينەروليك» نوميناتسياسىن «31-ارنا» ءتىلشىسى ارداق كامال، «ۇزدىك راديوباعدارلاما» نوميناتسياسىن «رەترو Fم» راديوسىنىڭ رەداكتور-جۇرگىزۋشىسى گۇلۆيرا بيعاليەۆا، «الەۋمەتتىك جەلىلەردەگى ەڭ ۇزدىك بەلسەندى قوعامدىق توپ» نوميناتسياسىن «ينستاگرام»، «فەيسبۋك»، «ۆكونتاكتە» الەۋمەتتىك جەلىلەرىندەگى «ءبىز ەكسترەميزمگە قارسىمىز!» پاراقشاسى جەڭىپ الدى. نوميناتسيا جەڭىمپازدارى الماتى قالاسى پروكۋرورىنىڭ ديپلومى مەن 100 مىڭ تەڭگە قارجىلاي سىيلىققا يە بولدى.

سونىمەن قاتار، 20 مىڭ تەڭگەلىك «ىنتالاندىرۋ» سىيلىعى جانە ارنايى ديپلومعا «انا ءتىلى» ۇلت گازەتىنىڭ ءتىلشىسى باعداگۇل بالاۋباەۆا، «كتك» ارناسى «اپتاپ» باعدارلاماسىنىڭ ءتىلشىسى دياس نۇراقىن، «Zakon.kz» جەلىلىك باسىلىمى ارنايى رەپورتاجدار ءبولىمىنىڭ رەداكتورى تورعىن نۇرسەيتوۆا، «ورت-ەۋرازيا» ارناسى «زاڭ سويلەسىن» باعدارلاماسىنىڭ ءتىلشىسى گۇلنۇر بايمەنوۆا، «baribar.kz» سايتىنىڭ ءتىلشىسى اقجارقىن قىدىرحانوۆا لايىق دەپ تانىلدى.

“The Qazaq Times”