ەو ءپوپۋليزمدى جەڭگىسى كەلسە، بوسقىندارعا شەكارانى اشپاۋى ءتيىس

Guardian ءۇش ءتۇرلى ەلدىڭ ىقپالدى لەۆوتسەنتريستىك ساياساتكەرلەرىنىڭ ميگراتسيالىق جاعدايعا قاتىستى سۇحباتىن جاريالادى.

باسىلىمنىڭ ساۋالدارىنا قاتىستى پىكىر بىلدىرگەن تانىمال ساياساتكەرلەردىڭ قاتارىندا اقش-تىڭ بۇرىنعى مەملەكەتتىك حاتشىسى جانە دەموكراتيالىق پارتيانىڭ اتىنان پرەزيدەنت لاۋازىمىنا كانديدات حيللاري كلينتون، ۇلىبريتانيانىڭ لەيبوريستىك پارتياسىنىڭ مۇشەسى، بۇرىنعى پرەمەر-ءمينيسترى توني بلەر جانە يتاليانىڭ ەكس-پرەمەرى ماتتەو رەنتسي بار. حيللاري كلينتوننىڭ پىكىرىنشە، ەۋروپا ءوزىنىڭ يمميگراتسيالىق ساياساتىن وزگەرتىپ، بوسقىندارعا قولداۋ كورسەتە المايتىندىعىن مويىنداۋى قاجەت. ساياساتكەر انگەلا مەركەل مەن ەو-نىڭ باسقا دا بىرقاتار ەلدەرىنىڭ كوشباسشىلارىنا قاراستى وڭ پىكىردە بولعانمەن، كوشى-قون ماسەلەلەرى بۇكىل الەمدەگى ۇلتشىلدىق ماسەلەسىن تۋعىزاتىنىن اتاپ ءوتتى.

سونداي-اق، كلينتون كوپتەگەن ادامدار ءۇشىن ميگراتسيالىق يدەيالاردىڭ ماڭىزدى ەكەندىگىن ايتتى. ول بارلىق امەريكاندىق جۇيە پايدا بولعان كەزدەن باستاپ اۆتوريتاريزم قاۋپىنە قارسى ارەكەت ەتۋگە باعىتتالعانىن ەسكە سالدى.

ۇلىبريتانيانىڭ بۇرىنعى پرەمەر-ءمينيسترى توني بلەر كلينتوننىڭ پىكىرىن قۇپتادى. بلەر مەينستريمدىك پارتيالار «پوپۋليستىك ريتوريكاعا» قارسى تۇرمايىنشا، ۇلتشىلدىق پەن پوپۋليزم ارتادى دەپ سانايدى. ونىڭ پىكىرىنشە، ادامدار مەملەكەتتى ساياسي قىسىمعا دەس بەرمەيتىن كوشباسشىنىڭ باسقارعانىن قالايدى.

ال ماتتەو رەنتسي: «كونفرونتاتسيا، الەمدىك داۋ، ءوزارا قاقتىعىس ونلاين قارىم-قاتىناسقا ءتان، ول بىرتە-بىرتە جەك كورۋ كليماتىن قالىپتاستىرادى. ياعني بارلىق داۋ الەۋمەتتىك جەلىلەردىڭ قاداعالانباۋىنان تۋىنداپ وتىر. بۇل بۇگىنگى جانە ەرتەڭگى ۇرپاقتىڭ باستى پروبلەماسى: ولار قىزعانىش، جەك كورۋگە دايىن تۇرادى. بۇرىن تابىستى كاسىپكەر، جۋرناليست نەمەسە ءارتىس ءۇشىن ءبىرىنشى قادام حالىق قوشامەتى بولسا، قازىر ءبىرىنشى رەاكتسيا – كۇمان. جىلدار وتكەن سايىن ءبىز قۇرمەتتەۋ، ماقتان ەتۋ سەزىمىن جوعالتتىق»، – دەيدى. ياعني رەنتسي قازىرگى بەلەڭ الىپ وتىرعان قايشىلىقتارعا جاڭا تەحنولوگيا مەن جاستاردىڭ ەنجارلىعى سەبەپ دەگەن پىكىر ءبىلدىردى. سەبەبى، عالامتورداعى جالعان اقپاراتتار مەن ونى تۇتىنۋشى جاستاردىڭ وي-ساناسى سەپاراتيزمنىڭ ارتۋىنا اكەپ سوعادى.

الەمگە بەلگىلى ساياساتكەرلەر مەن شەندىلەر ءسوزىنىڭ توبىقتاي ءتۇيىنى: بوسقىندارعا شەكارانى اشىق قالدىرماۋ قاجەت، ەركىنسىتپەۋ كەرەك دەگەنگە سايادى. سەبەبى، ءدىلى، ءدىنى مۇلدە وزگە جۇرت اراسىندا الاۋىزدىق، ۇلتشىلدىق ءجيى ورىن الۋى مۇمكىن. قانشا دەگەنمەن امەريكا مەن ۇلىبريتانيا ميگراتسيالىق ماسەلەلەردى ءجىتى قاداعالاۋ كەرەكتىگىن ەسكەرتسە دە، «بەرليننىڭ قۇشاعى بارشاعا اشىق!» دەپ ۇرانداعان گەرمانيا كانتسلەرى انگەلا مەركەل تاراپى بۇل ۇسىنىسقا ەش پىكىر بىلدىرەن جوق.

"The Qazaq Times"