تاشكەنت ۋكراينادان ي.كارىموۆتىڭ تۇتقىندالعان تۋىسىن قايتارۋدى سۇرادى

ۋكراينا باس پروكۋراتۋراسى قىزمەتكەرىنىڭ سءوزىنە قاراعاندا، ءوزبەكستاننىڭ باس پروكۋراتۋراسى يسلام كارىموۆتىڭ ءايەلىنىڭ نەمەرە ءىنىسى، 33 جاستاعى اكبارالي ابدۋللاەۆتى ەكستراديتسيالاۋدى سۇراعان. بۇل اقپاراتتى ءوزبەكستاننىڭ باس پروكۋراتۋراسى راستادى دەپ جازادى "ورتالىق ازيا حابار قىزمەتى".

وزبەكستان باس پروكۋراتۋراسىنىڭ ايىپتاۋ قورىتىندىسىنا سايكەس، اكبارالي ابدۋللاەۆقا ميلليونداعان قارجىنى قىلمىستىق جولمەن جىمقىردى، كىرىستى زاڭداستىردى جانە شەتەل ۆاليۋتاسىن ساقتادى دەگەن ايىپتار تاعىلعان. 33 جاستاعى اكبارالي ابدۋللاەۆقا وزبەكستاننىڭ باس پروكۋراتۋراسى تاراپىنان حالىقارالىق ىزدەۋ جاريالانعان.

2013 جىلدىڭ 10 قازانىندا ابدۋللاەۆقا اۋىر ەكونوميكالىق قىلمىس جاسادى دەگەن ايىپ تاعىلىپ، يسلام​ كاريموۆتىڭ تىكەلەي بۇيرىعىمەن تۇتقىندالعان. 2014 جىلدىڭ قاراشا ايىندا ول 15 جىلعا سوتتالعان. كەيىننەن وعان 6 جىل، 6 اي جازا تاعايىندالدى.

تۇرمەدە ەكى جارىم جىل وتىرعان ابدۋللاەۆ مەرزىمىنەن بۇرىن شارتتى بوستاندىققا شىققان. الايدا 2016 جىلدىڭ 2 قىركۇيەگىندە يسلام كاريموۆ قايتىس بولعاننان كەيىن، ول ەلدەن زاڭسىز قاشىپ كەتكەن.

ۇستىمىزدەگى جىلدىڭ 14 قاڭتارىندا ابدۋللاەۆ كيەۆ اۋەجايىندا تۇتقىندالعان.

كيەۆتەگى سولومەنسك اۋداندىق سوتىندا اكبارالي ابدۋللاەۆ پەن ونىڭ ادۆوكاتى وزبەكستان بيلىگى قوزعاپ وتىرعان قىلمىستىق ءىستىڭ نەگىزسىز ەكەنىن ايتقان. ابدۋللاەۆ قىلمىسى ءۇشىن جازاسىن وتەگەنىن، ءوزىن وزبەكستانعا جىبەرمەۋىن ءوتىنىپ، ونداعى تۇرمەلەردە اياۋسىز ازاپتايدى دەگەن.

«The Qazaq Times»