قىرعىزستان ەكس-پرەزيدەنتى المازبەك اتامباەۆ: «ورتالىق ازيا بەيبىتشىلىك پەن كەلىسىمگە ميرزيەەۆتىڭ ارقاسىندا كەلدى» - دەپ مالىمدەدى.

قاراشا ايىنىڭ 19-ى كۇنى ءوزىنىڭ يەلىگىندەگى «اپرەل» تەلەارناسىنا سۇحبات بەرگەن المازبەك اتامباەۆ قىرعىزستاننىڭ ىشكى جانە سىرتقى ساياساتىنا قاتىستى، جەكە بايلىعى مەن جەمقورلىقپەن كۇرەس جونىندەگى جۋرناليستەر سۇراعىنا جاۋاپ بەردى.

ول وندا جۋرناليستەردىڭ: «ءسىز پرەزيدەنت بولىپ تۇرعان تۇستا وتە قىزۋ قاندى مالىمدەمەلەر جاسادىڭىز. بىرەۋلەر ءسىزدىڭ بۇل ارەكەتىڭىزدى وزگە ەلدەرمەن قارىم-قاتىناسىمىزدى قيىنداتۋعا الىپ كەلدى دەپ ەسەپتەيدى. ءسىز نەگە ولاي ىستەدىڭىز؟» دەگەن سۇراعىنا: «مەن كەرسىنشە، رەسەي سياقتى ەلدەرمەن قارىم-قاتىناسىمىزدى جاقسارتتىم. باكيەۆتىڭ كەزىندە جاعداي مۇلدە باسقا ەدى. ءيا، يسلام كارىموۆتىڭ تۇسىندا وزبەكستانمەن قارىم-قاتىناسىمىز وتە قيىن بولدى. مەن ول كەزدە ونىڭ الدىندا باسىمدى يگىم كەلمەدى. بىراق مەنىڭ وزبەكستاننىڭ قازىرگى پرەزيدەنتى شاۆكات ميرزيەەۆپەن قارىم-قاتىناسىم وتە جاقسى بولدى. ميرزيەەۆ وزبەكستاندى عانا وزگەرتىپ قويعان جوق. ول بۇكىل ايماقتىڭ جاعدايىن وزگەرتتى. بۇل بىرەۋگە ۇنار، بىرەۋگە ۇناماس، بىراق ءدال قازىر ورتالىق ازياداعى بەيبىتشىلىك پەن كەلىسىم ميرزيەەۆتىڭ ارقاسى. بۇنداي دۇنيەنى وزگەلەر ون جىلداپ جاساي المادى. ال ول ەكى جىلدىڭ ىشىندە ايماق قارىم-قاتىناسىن وسىنداي دەڭگەيگە كوتەردى. ال نازارباەۆقا كەلەتىن بولساق، قازىر وزگە ءبىر مەملەكەتتەردىڭ سايلاۋلارعا ارالاسۋى وتە وزەكتى ماسەلە. اقش-تا ساياساتكەرلەر پرەزيدەنت سايلاۋى كەزىندە رەسەي ازاماتتارىمەن ارالاسقانى ءۇشىن قىزمەتتەرىنەن كەتىپ جاتىر. بىزدە كورشى مەملەكەتتىڭ باسشىسى پرەزيدەنتتىككە ۇمىتكەر ادامدى قابىلداپ، جارنامالاۋدا. بۇل ارالاسۋ ەمەس پە؟ ءيا، كورشىمىز، ءيا، باي مەملەكەت. بىراق ءبىزدىڭ تاۋەلسىزدىگىمىز قايدا؟ مەنىڭ ءالى ەسىمدە، 2010 جىلى پارلامەنت سايلاۋىندا، 2011 جىلى پرەزيدەنت سايلاۋىندا كوبىسى كورشى مەملەكەتتەردەن اقشا الدى. بۇنى توقتاتۋ كەرەك بولدى. مەن سونى ىستەدىم. بۇدان بىلاي الداعى سايلاۋلاردا اشىق ارالاسۋلار بولمايدى دەپ ەسەپتەيمىن. ال مەنىڭ نازارباەۆپەن جەكە قارىم-قاتىناسىما كەلەتىن بولساق، بۇل ەندى مۇلدە باسقا تاقىرىپ. بىراق ءبىزدىڭ جەكە قارىم-قاتىناسىمىز مەملەكەتارالىق قارىم-قاتىناستارعا اسەر ەتپەيدى. سەبەبى ءبىز كورشىمىز جانە ەۋرازيالىق ەكونوميكالىق وداقتامىز» - دەپ جاۋاپ بەردى.

ەستەرىڭىزگە سالايىق، 2017 جىلى بولعان پرەزيدەنت سايلاۋى كەزىندە  قىرعىزستان پرەزيدەنتى المازبەك اتامباەۆ نۇرسۇلتان نازارباەۆتى سايلاۋعا ارالاستى دەپ ايىپتاپ، «كورشى ەلدىڭ ديكتاتورى» دەپ بىرنەشە رەت مالىمدەمە جاساعان. وسىدان كەيىن رەسمي استانا قىرعىزستانمەن اراداعى شەكارانى ۋاقىتشا جاۋىپ تاستاعان.

"The Qazaq Times"