مەكسيكا حالقى بوسقىنداردىڭ كەلۋىنە قارسى شىقتى

مەكسيكا شەكاراسىنداعى تيحۋانا قالاسىنىڭ تۇرعىندارى وڭىرگە زاڭسىز ميگرانتتاردىڭ كەلۋىنە قارسى ەرەۋىلگە شىقتى. بۇل تۋرالى Euronews حابارلادى.

ءبىر اپتا بۇرىن گوندۋراستان بەت العان بوسقىندار كەرۋەنى مەكسيكا شەكاراسىنا جەتكەن. مەكسيكا قاۋىپسىزدىك كۇشتەرى ميگرانتتارعا توسقاۋىل قويىپ، شەكارا ماڭىندا قاقتىعىستار ورىن الدى. ال مەكسيكا تۇرعىندارى ورتالىق امەريكادان شىققان بوسقىنداردى ەلگە كىرگىزبەۋ كەرەك دەپ ۇراندادى. ەررەۋىلگە تيحۋانادان بولەك، سان-ديەگو مەن كاليفورنيا شتاتىنىڭ تۇرعىندارى دا قاتىسقان. اسكەريلەر مەن ءتارتىپ ساقشىلارى ەرەۋىلشىلەردى بوسقىندار لاگەرىنە جەتكىزگەن جوق.

وسىعان دەيىن اقش پرەزيدەنتى دونالد ترامپ ءوزىنىڭ تۆيتتەر پاراقشاسىندا مالىمدەمە جاساپ، ەگەر مەكسيكا زاڭسىز ميگرانتتاردىڭ اقش-قا كىرۋىن توقتاتا الماسا، وندا قۇراما شتات ەكى ەل شەكاراسىنا ارنايى اسكەرلەردى جىبەرەتىنىن ايتقان بولاتىن. ءارى، زاڭسىز ميگرانتتارعا ساياسي باسپانا بەرمەۋ تۋرالى زاڭعا قول قويدى. سونداي-اق مەكسيكامەن شەكارا كۇشەيتىلىپ، 6 مىڭنان استام جاۋىنگەر ورنالاستىرىلدى. قارۋلى اسكەر شەكارا ماڭىن تورۋىلداسا دا، ەلىنەن قاشقان ميگرانتتار قالاي دا شەكارا اسۋعا دايىن.

ەستەرىڭىزگە سالايىق، ءبىر اي بۇرىن گوندۋراستان بەت العان التى مىڭعا جۋىق بوسقىن مەكسيكا شەكاراسىنا جەتىپ، ارى اسپاق بولعان. جاقىن ارادا ولاردىڭ سانى بەس مىڭعا جەتۋى مۇمكىن. كەلىمسەكتەردىڭ ءبىراز بولىگى مەكسيكادا قالسا، قالعانى اقش-تان ساياسي باسپانا سۇراعان.

"The Qazaq Times"