ساۋد حانزاداسىنىڭ ادام ولتىرتكەنى راس پا: ترامپ سەيسەنبى كۇنى انىق جاۋابىن بەرمەك

امەريكالىق باق وسىدان بۇرىن، ورتالىق بارلاۋ اگەنتتىگىنىڭ تەرگەۋ ناتيجەسىنە سىلتەمە جاساپ، جۋرناليست حاشوگگيدى ولتىرۋگە ساۋد پاتشالىعىنىڭ تاق مۇراگەرى مۇحاممەد بين-سالماننىڭ بۇيرىق بەرگەنى تۋرالى حابار تاراتقان ەدى. الايدا، پرەزيدەنتى دونالد ترامپ مالىمدەمەسىندە، ورتالىق بارلاۋ اگەنتتىگى بۇل ءىس بويىنشا سوڭعى قورىتىندى مالىمەتتى ءالى دە دايىنداپ بولماعانىن، سەيسەنبى كۇنى تولىق مالىمەت بەرەتىنىن جەتكىزدى.

كاليفورنياداعى ءورت جاعدايىنا بايلانىستى جاساعان ساپارى كەزىندە باق وكىلدەرىنىڭ سۇراقتارىنا جاۋاپ بەردى. ول سوزىندە، سەيسەنبى كۇنى كىسى ءولتىرۋشى مەن وعان بۇيرىق بەرۋشى تۋرالى تولىعىراق مالىمەتتىڭ بولاتىنىن ايتتى. ترامپ مالىمدەمەسىنەن بىرنەشە ساعات بۇرىن اقش مەملەكەتتىك دەپارتامەنتى دە وسىعان ۇقساس مالىمەت  تاراتقان ەدى. وندا: «قۇراما شتات جۋرناليست حاشوگگيگە جاسالعان قاستاندىق ىسىنە بايلانىستى سوڭعى قورىتىندىعا ءالى كەلگەن جوق»، – دەلىنگەن ەدى.

دەگەنمەن، اقش مەملەكەتتىك دەپارتامەنتى كىسى ولتىرۋگە قاتىستىلار جازاسىز قالمايتىنىن، دەگەنمەن، ءالى دە دالەلدەنبەگەن كوپتەگەن ماسەلەلەردىڭ بار ەكەنىن ەسكەرتكەن بولاتىن.

قۇراما شتات حاشوگگي ىسىنە قاتىسى بار دەپ تانىلعان 17 لاۋازىمدى تۇلعانى سانكتسيا تىزىمىنە ەنگىزگەن. الايدا، اقش كونگرەسىنىڭ كەيبىر مۇشەلەرى ساۋد ارابياسىمەن قارۋ-جاراق ساۋداسىن قامتىعان كوپتەگەن ماسەلەدە ىنتىماقتاستىقتان قول ۇزبەۋ كەرەك ەكەنىن قۋاتتاپ شىقتى.

اقش پرەزيدەنتى دە وسىعان دەيىن ساۋد ارابياسىنا  ساتىلاتىن قارۋ-جاراق كولەمىن ازايتقىسى كەلمەيتىنىن بىلدىرگەن. كەرىسىنشە، وڭىردەگى باستى قارسىلاسى يرانمەن بولاتىن كۇرەستە، سونداي-اق، قارۋ-جاراق ساتۋ-ساتىپ الۋ ىستەرىندە ىنتىماقتاستىقتى كەڭەيتۋ كەرەكتىگىن العا تارتقان. «ءبىز ولارعا قارۋ ساتپاعانىمىزبەن، ولار ءبارى ءبىر رەسەي نەمەسە قىتايدان قارۋ-جاراق ساتىپ الادى»، – دەگەن بولاتىن اقش پرەزيدەنتى.

اقش قورعانىس وكىلدەرى دە بۇل ماسەلەدە ترامپتى قولدايتىن سىڭايلى. ولار سەنبى كۇنى وتكەن فورۋمدا، ساۋد ارابياسى اقش-تىڭ ورتا شىعىستاعى قادامدارى ءۇشىن اسا ماڭىزدى ەكەنىن اتاپ ايتتى.

“The Qazaq Times”