اقش ساۋد ارابياسىنا سانكتسيا ەنگىزدى

اقش يەمەندەگى قارۋلى قاقتىعىس پەن جۋرناليست جامال حاشوگگيدىڭ ولىمىنە قاتىستى ساۋد ارابياسىنا قارسى سانكتسيا ەنگىزدى.

قۇراما شتاتتارىنىڭ سەنات كونگرەسى مۇشەلەرى ساۋد ارابياسىنا قارۋ-جاراق ساتۋدى ۋاقىتشا توقتاتۋ تۋرالى جاڭا زاڭ جوباسىن ۇسىندى. قاتاڭ قاۋلى تىزىمىنە بارلىعى ون جەتى ادام، ولاردىڭ قاتارىندا ساۋد ارابياسىنىڭ ستامبۋلداعى باس كونسۋلى، بارلاۋ قىزمەتىنىڭ پولكوۆنيگى جانە تاق مۇراگەرى مۇحاممەد يبن سالماننىڭ كەڭەسشىسى بار. «ماگنيتتىك جاھاندىق زاڭ» اياسىندا سالىنعان سانكتسيالار بويىنشا قارجىلىق شەكتەۋگە ىلىنگەن ادامدارعا اقش-پەن ەكونوميكالىق بايلانىس ورناتۋعا جانە شەكارادان وتۋگە قاتاڭ تىيىم سالىنادى.

وسىعان دەيىن اقش سانكتسياسى ساۋديالىق ءتىلشى ءولىمىن ۇيىمداستىردى دەپ تانىلعان ون ءبىر كۇدىكتىنىڭ بەسەۋى ءولىم جازاسىنا كەسىلەتىنىن ايتقان. اق ءۇي باسشىسى دونالد ترامپ: «حاشوگگيدىڭ ءولىمى ساۋد ارابياسىنىڭ بەدەلىنە نۇقسان كەلتىردى. ساۋد ارابياسىنىڭ حانزاداسىمەن حابارلاسقانىمدا، ول بۇل ىسكە ەش قاتىسى جوق ەكەنىن ايتتى. دەمەك، وعان باسقا ادامدار جاۋاپتى. تەرگەۋ ءىسى ءالى دە جالعاسىپ جاتىر. مىندەتتى تۇردە ءتيىستى شارا قولدانىلادى. كوپ ۇزاماي ناقتى اقپاراتا كول جەتكىزەمىز» – دەگەن بولاتىن. ال ساۋد ارابياسىنىڭ تاق مۇراگەرى مۇحاممەد بين سالمان جۋرناليست جامال حاشوگگيدىڭ ءولىمىن «جانتۇرشىگەرلىك قىلمىس» دەپ، تەرگەۋدەن سوڭ كىنالىلەردىڭ زاڭ الدىندا جاۋاپقا تارتىلاتىنىنا ۋادە بەردى. بىراق، تۇركيا پرەزيدەنتى رەجەپ تايىپ ەردوعان 23 قازاندا ساۋد ارابياسىنىڭ بيلىگى حاشوگگيدى قاساقانا جانە الدىن الا جوسپارلاپ ولتىرگەنىن مالىمدەگەن.

"The Qazaq Times"