كاتار قورعانىس ءمينيسترى اقش-تا: شىعاناقتىڭ شاعىن ەلى شار-تاراپپەن بايلانىستى كۇشەيتتى

كاتار پرەمەر-ءمينيسترىنىڭ ورىنباسارى جانە قورعانىس ءمينيسترى حاليد يبن مۇحاممەد ءال-اتتيە اقش مەملەكەتتىك حاتشىسى مايك پومپەومەن ۋاشينگتوندا كەزدەستى. كەزدەسۋدە اقش-كاتار اراسىنداعى وڭىرلىك قورعانىس ىنتىماقتاستىعىن دامىتۋ ىستەرى قولعا الىنعان. بۇل تۋرالى «ءال-جازيرا» اقپاراتتىق اگەنتتىگى حابارلادى.

اقش مەملەكەتتىك دەپارتامەنتىنىڭ جازباشا مالىمدەمەسىندە، ەكى ەلدىڭ لاۋازىمدى تۇلعالارى كەزدەسۋ بارىسىندا، وڭىرلىك قاۋىپسىزدىك پەن تۇراقتىلىققا ورتاق مۇددەلەرىنىڭ بار ەكەنىن العا تارتا وتىرىپ، وسى باعىتتاردا قۇراما شتات الداعى ۋاقىتتا كاتارمەن تىعىز بايلانىستا بولاتىنى ايتىلعان.

كەزدەسۋدە، شىعاناق ىنتىماقتاستىق كەڭەسىنىڭ نەگىزىندە تاياۋ-شىعىس وداقتاستىعىن قۇرۋ تۋرالى باستاما كوتەرىلگەن. سونىمەن بىرگە، پومپەو مەن ءال-اتتيە اقش-تىڭ كاتارداعى اۋە بازاسىن كەڭەيتۋ ءىسىن اقىلداسقان.

حاليد يبن مۇحاممەد ءال-اتتيە اقش ساپارى كەزىندە پەنتاگون باسشىسى جەيمس مەتتيسپەن دە كەزدەسىپ، قورعانىس ىنتىماقتاستىعىن دامىتۋ تۋرالى كەڭەسىپ قايتتى.

سوڭعى ۋاقىتتا شىعاناقتىڭ ماڭىزدى ويىنشىلارىنىڭ ءبىرى كاتار سىرتقى ەلدەرمەن قارىم-قاتىناستا بەلسەندىلىك تانىتىپ، باتىس ەلدەرىمەن قورعانىس ىنتىماقتاستىعىن جانداندىرا باستادى. ال باتىستىق الپاۋىتتار كاتار، كۋۆەيت، ومان، ءباا قاتارلى شىعاناقتىڭ شاعىن ەلدەرى ارقىلى ايماقتاعى امبيتسياسىن جۇزەگە اسىرىپ كەلەدى.

“The Qazaq Times”