ۇلىبريتانيا بيلىگى Brexit جوسپارىن ماقۇلدادى

ۇلىبريتانيا ۇكىمەتى ەۋرووداقتان شىعۋ تۋرالى Brexit جوباسىن ماقۇلدادى.

مينيسترلەر كابينەتىنىڭ 5 ساعاتقا سوزىلعان وتىرىسىنان سوڭ پرەمەر-ءمينيسترى تەرەزا مەي ۇكىمەت وتىرىسىندا جاسالعان كەلىسىم بىرىككەن كورولدىكتىڭ ۇلتتىق مۇددەلەرىنە تولىق ساي كەلەتىنىن ايتتى. سونىمەن قاتار، بىرىككەن كورولدىك ەو-دان شىققان سوڭ، قوس يرلانديامەن اراداعى شەكارالىق بايلانىستى رەتتەۋگە ءسوز بەردى. سولتۇستىك يرلانديا مەن يرلانديا ازاماتتارى شەكارادا ەركىن ءجۇرىپ، ساۋدا-ساتتىق جاساۋ كەزىندە شەكارادان ءوتۋ وڭاي بولعانىن قالايدى. دەگەنمەن، لوندون سولتۇستىك يرلانديا مەن بريتانيانىڭ باسقا ايماقتارى اراسىنداعى كەدەن شارتتارىنا ايتارلىقتاي وزگەرىس ەنگەنىن قولدامايدى.

ەۋروپالىق وداقتىڭ Brexit بويىنشا وكىلى ميشەل بارنە: «قانشا جەردەن پرەملەردىڭ پىكىرىن قۇپتاماساق تا، بريتانيامەن ورتاق دوس بوپ قالا بەرەمىز. الداعى ۋاقىتتا Brexit وڭ شەشىمىن تاۋىپ، ەكونوميكالىق تۇراقتىلىق ورنايدى دەگەن سەنىم بار. بىزدەر يرلانديامەن اراداعى شەكاراعا قاتىستى ماسەلەنىڭ شەشىمىن تاپتىق. ەگەر 2020 جىلدىڭ شىلدە ايىنا دەيىن ۇلگەرمەسەك، وتپەلى كەزەڭدى بىرلەسە وتىرىپ ۇزارتۋىمىز مۇمكىن»، – دەدى.

الداعى ۋاقىتتا ۇلىبريتانيا ۇكىمەتى ماقۇلدانعان 585 بەتتىك قۇجاتتىڭ ءماتىنىن پارلامەنتتە باياندايدى. بريۋسسەلدە دە ەۋرووداق قۇرامىندا قالعان 27 ەلدىڭ وكىلدەرى Brexit ماسەلەسىن كەڭىنەن تالقىلاعان. ەندى بۇگىن ەۋرووداق تاراپىنان باستى كەلىسسوز جۇرگىزۋشىسى ميشەل بارنە ەۋروپالىق كەڭەستىڭ پرەزيدەنتى دونالد تۋسككە Brexit بويىنشا بارلىق جاعدايدى مالىمدەۋى ءتيىس. ساراپشىلاردىڭ بولجامى بويىنشا، بريتانيا پارلامەنتىنىڭ تەرەزا مەيگە سەنىمسىزدىك ۆوتۋمىن جاريالاۋى ءالى دە عاجاپ ەمەس.

ايتا كەتەيىك، ۇلىبريتانيا ەۋرووداق قۇرامىنان 2019 جىلدىڭ 29 ناۋرىزىندا شىعادى. ال 2020 جىلدىڭ سوڭىنا دەيىن ىشكى نارىقتاعى جاعداي، ديپلوماتيالىق بايلانىس پەن ەۋروپالىق ساياساتقا رەفورمالار ەنگىزىلمەيدى.

"The Qazaq Times"