اقش-سولتۇستىك كورەيا كەلىسسوزىنىڭ داعدارىسى: ترامپتىڭ ءۇمىتى اقتالمادى

امەريكالىق اناليتيكالىق ورتالىقتاردىڭ ءبىرى سولتۇستىك كورەيادان باسقارىلمالى زىمىرانداردى جاسىرۋعا قابىلەتتى كەمىندە 13 جاسىرىن بازانىڭ بار ەكەنىن انىقتادى. ساراپشىلاردىڭ ايتۋىنشا، بۇل قۇراما شتاتتىڭ سولتۇستىك كورەيانى يادرولىق قارۋدان باس تارتۋعا كوندىرۋگە باعىتتالعان جۇمىستارىنىڭ ساتسىزدىگىن اڭعارتادى.

ەستەرىڭىزدە بولسا، بيىل ماۋسىم ايىندا ترامپ-كيم اراسىنداعى تاريحي كەلىسسوز كەزىندە سولتۇستىك كورەيا باسشىسى يادرولىق قارۋدان بىرتىندەپ باس تارتاتىنىن مالىمدەگەن ەدى. سول كەزدەسۋدەن كەيىن ترامپ: «ول (كيم جوڭ ۋن) سولتۇستىك كورەياعا قايتىپ بارعاننان كەيىن يادرولىق قارۋدان باس تارتۋ پروتسەسىن باستايدى دەپ ويلايمىن»، – دەگەن بولاتىن.

سودان بەرى 5 اي ۋاقىت ءوتتى. جاقىندا عانا ۋاشينگتونداعى ستراتەگيالىق جانە حالىقارالىق بايلانىستار جونىندەگى زەرتتەۋ ورتالىعى سولتۇستىك كورەيادا كەمىندە 13 جەردە جاسىرىن زىمىران وپەراتسيالار بازاسى بار ەكەنىن انىقتاپ وتىر.  ونىڭ ۇستىنە جاسىرىن بازالار دەميليتاريزاتسيالانعان ايماققا جاقىن ورنالاسقان. بۇل وسى ۋاقىت ىشىندە كيم جوڭ ۋن يادرولىق قارۋدان باس تارتۋ پروتسەسىنىڭ ورنىنا، بالليستيكالىق زىمىرانداردى دامىتۋدى جالعاستىرعانى دالەلدەگەندەي.

اتالعان امەريكالىق ورتالىقتىڭ ايتۋىنشا، ءسولتۇستى كورەيا بالليستيكالىق زىمىران باعدارلاماسىنا كوپ ۋاقىتىن، قارجىسىن جانە رەسۋرستارىن جۇمسادى، ءارى ولار بۇنى ستراتەگيالىق كۇش دەپ قارايدى. سونىمەن بىرگە، ولار ءۇشىن بۇل بولاشاق وڭتۇستىك كورەيا نەمەسە امەريكانىڭ اسكەري شابۋىلىن بولدىرمايتىن كۇش ەسەپتەلەدى.

ترامپ-كيم سامميتىنەن كەيىن، كەيبىر ديالوگتاردى ەسەپكە الماعاندا، تاراپتار تىكەلەي يادرولىق قارۋسىزداندىرۋ پروتسەسىنە جۇمىس الىپ بارمادى. سولتۇستىك كورەيا يادرولىق سىناق پوليگونىن بۇزعانىن مالىمدەدى. الايدا، كەيىن رەسمي مالىمدەمەسىندە، بۇل بازانىڭ ەندىگى جەردە كەرەگى جوق ەكەنىن دە ايتقان. الايدا، سولتۇستىك كورەيا زىمىران سىناق الاڭدارى مەن بازالارىن جويۋدا بەلسەندىلىك تانىتپادى. وسىعان قاراماستان ەكى ەل اراسىنداعى قارىم-قاتىناس تاريحتاعى ەڭ جوعارى دەڭگەيگە دەيىن دامي بەردى.

سولتۇستىك كورەيا ماسەلەسىمەن اينالىسقان شەتەلدىك ەكسپەرتتەردىڭ كوبى، سولتۇستىك كورەيانىڭ بالليستيكالىق زىمىرانداردان باس تارتپايتىنىن كەسىپ ايتادى. بۇرىنعى اقش ديپلوماتتارىنىڭ پىكىرىنە قاراعاندا، قۇراما شتات ۇكىمەتى سولتسۇتىك كورەيادا كوپتەگەن جاسىرىن زىمىران بازالارىنىڭ بار ەكەنىن، ولاردىڭ زىمىران باعدارلاماسىن جالعاستىرىپ وتىرعانىن بۇرىننان بىلگەن.

پانجۋموڭداعى ۇشجاقتى كەلىسسوزدەردىڭ ناتيجەسىنە قاراماستان، اقش پرەزيدەنتى سولتۇستىك كورەيانىڭ بەينەسى جاقسى دەپ باعالاعان بولاتىن. ول جانە كيم جوڭ ۋنمەن ەكىنشى رەتكى كەزدەسۋ كەزىندە، بۇل ماسەلەلەردى تۇبەگەيلى شەشۋگە مۇمكىندىك بولاتىنىن ايتقان. پومپەو ءبىر رەتكى مالىمدەمەسىندە، پرەزيدەنت ترامپ ءوزىنىڭ ەكىنشى وكىلەتتى مەرزىمىنەن بۇرىن سولتۇستىك كورەيامەن يادرولىق قارۋسىزدانۋ كەلىسىمىنە كەلۋدى ماقسات ەتەتىنىن ايتقان.

الايدا، بۇل بارىستا دا جاقىندا وزگەرىستەر تۋىلدى. اقش مەملەكەتتىك حاتشىسى پومپەو مەن سولتۇستىك كورەيا جوعارى لاۋازىمدى وكىلى كيم ياڭ اراسىنداعى كەلىسسوز سوڭعى ساتتەردە توقتاتىلدى. ونىڭ ۇستىنە تاراپتار بۇل تۋرالى ەشقانداي تۇسىنىك بەرمەدى. كەيبىر ەلدەردىڭ اقپارات قۇرالدارى، اقش پەن سولتۇستىك كورەيا اراسىنداعى ديالوگتار داعدارىسقا ۇشىرادى دەپ تە باعالادى. ال، سوڭعى كەزدەرى امەريكالىق باسىلىمدار كەلىسسوزدىڭ توقتاتىلۋى سولتۇستىك كورەيانىڭ جاسىرىن زىمىران بازالارىنا بايلانىستى دەگەن پىكىرلەردى ايتتى.

“The Qazaq Times”