مەركەلدىڭ ورنىنا ۇمىتكەرلەر سانى ارتىپ كەلەدى

گەرمانيا كانتسلەرى انگەلا مەركەل بۋندەستاگتاعى حريستيان-دەموكراتيالىق وداقتىڭ (حدس) جەتەكشىلىگىنە كۇرەسۋگە نيەتتى ەمەستىگىن ايتقان سوڭ، ونىڭ ورنىن باسۋعا 12 ۇمىتكەر ءوز كانديداتۋراسىن ۇسىندى.

وسىعان دەيىن گەرمانيا تاريحىندا اتالعان لاۋازىمعا تالاسقاندار كەزدەسپەگەن. ساراپشىلاردىڭ پىكىرىنشە، بۇل لاۋازىمعا 3 ۇمىتكەر عانا لايىقتى. ولاردىڭ قاتارىندا 22 جاسىندا بۋندەستاگقا سايلانعان دەنساۋلىق  ساقتاۋ ءمينيسترى، جاس ساياساتكەر يەنس شپان بار. مەركەلدىڭ ميگراتسيالىق ساياساتىنا تۇبەگەيلى قارسى ۇمىتكەر گەرمانياداعى ساياسي جۇيەگە رەزونانس تۋعىزباق نيەتتە. ەكىنشى ۇمىتكەر فريدريح مەرتس قازىرگى كانتسلەردىڭ بۇرىننان كەلە جاتقان باقتالاسى. ف.مەرتس ۇكىمەتتە ءبىراز ۋاقىت ەڭبەك ەتكەن، بىراق 2002 جىلى مەركەل ونى قىزمەتىنەن بوساتتى. ال ءۇشىنشى ببولىپ كەزەكتە تۇرعان انگەلا مەركەلدىڭ ەڭ جاقىن ۇزەڭگىلەستەرىنىڭ ءبىرى، پارتيا حاتشىسى اننەگرەت كرامپ-كاررەنباۋەر بيلىككە كەلسە، پارتيا ساياساتى وزگەرە قويمايدى.

بۇدان بولەك، گەرمانيا كانتسلەرى 2021 جىلى وتەتىن سايلاۋدا كوشباسشىلىققا ۇمىتكەر قاتارىندا بولمايتىنىن مالىمدەگەن بولاتىن. مەركەلدىڭ بۇل شەشىمى الەمدىك ساياساتتاعى كۇتپەگەن جاڭالىقتاردىڭ ءبىرى. 2005 جىلدان باستاپ گفر ۇكىمەتىن باسقاراتىن ول مانسابىن توقتاتىپ قانا قويماي، گامبۋرگتەگى پارتيا سەزىندە ءوز كانديداتۋراسىن حدس توراعاسى لاۋازىمىنا ۇسىنبايتىنىن ايتتى. وسىعان دەيىن گەسسەن ايماعىندا وتكەن سايلاۋ ناتيجەسىندە مەركەل باسقاراتىن وداق جەڭىسكە جەتكەن بولاتىن. دەگەنمەن، داۋىس بەرۋ بويىنشا 27,2% قولداۋ كورگەن پارتيا ايتارلىقتاي ماردىمدى جەتىستىككە جەتكەن جوق. ال ورتالىق سولشىل سوتسيال-دەموكراتيالىق پارتياسى 19,6% داۋىسقا يە بولدى. پايىزدىق كورسەتكىشتەردى وسىدان بەس جىل بۇرىنعى سايلاۋ قورىتىندىسىمەن سالىستىرساق، حريستيان-دەموكراتيالىق وداعى 12%-عا جۋىق تومەن كورسەتكىش كورسەتكەن.

مەركەل پارتياسىن ناقتى كىمنىڭ باسقاراتىنى 8 جەلتوقساندا گامبۋرگتە وتەتىن سايلاۋ كەزىندە بەلگىلى بولادى.

"The Qazaq Times"