Facebook قولدانۋشى: ترامپ پەن ابە داستارحان باسىندا سولتۇستىك كورەيا زىمىران شابۋىلىن تالقىلادى

الەمدىك باسىلىمدار (“The New York Times”، “ Sina.Net”) اقش پرەزيدەنتى دونالد ترامپ پەن جاپونيا پرەمەر-ءمينيسترى شيندزو ابە فلوريداداعى ليۋكس مەيرامحانادا تاماقتانا وتىرىپ، سولتۇستىك كورەيا تاقىرىبىن تالقىعا سالدى دەپ حابارلاۋدا.

13 اقپان كۇنى، اقش پرەزيدەنتى دونالد ترامپ فلوريداداعى "Mar A Loga" ساۋلەتتى مەيرامحاناسىندا جاپون باس ۋازىرىمەن تاماقتانا وتىرىپ، سولتۇستىك كورەيانىڭ زىمىراندار اتۋى مەن وعان قالاي توتەپ بەرۋ تاقىرىبىن تالقىلاعان دەگەن حابار بار. بۇل حاباردىڭ ەڭ باستاپقى قاينارى DeAgazio اتتى Facebook قولدانۋشى ءوزىنىڭ جەكە پاراقشاسىندا جاريالاعان جازباسى مەن فوتو سۋرەتتەرىندە بولسا كەرەك. ول ءبىر توپ كومەكشىلەرى قورشاپ تۇرعان ۇستەلدە ترامپ پەن ابەنىڭ قىزۋ اڭگىمەدە وتىرعان سۋرەتتەرىن جاريا ەتكەن. وندا كومەكشىلەرى بىرنەشە فايلداردى ەكەۋىنە ۇسىنىپ، ۇيالى تەلەفوننىڭ شىراعى ارقىلى جارىق ءتۇسىرىپ تۇرعانى بايقالادى.  DeAgazio ءوزىنىڭ پاراقشاسىنا: «وي، ءتاڭىرىم! سولتۇستىك كورەيا جاپونياعا قاراتا زىمىران اتتى دەگەن حابار بار. كەشكى اس ىشۋگە بارعانىمدا وسى ءبىر كورىنىستى (سۋرەتتەگىدەي) كوردىم»، – دەپ جازىپتى. سوسىن ول از كەڭەستەن كەيىن اسىعا بارىپ، ءبىر بولمەدە ەكى ەل باسشىسىنىڭ شۇعىل ماجىلىسكە وتىرعانىن ايتادى.

حابارلارعا نەگىزدەلگەندە، ەكى ەل باسشىلارى مەيرامحانا ەسىك الدىندا جەتىپ، سۋرەتكە تۇسكەن كەزدە، ءبىر جۋرناليست ولاردان شامامەن ءبىر ساعات بۇرىن سولتۇستىك كورەيانىڭ زىمىران اتقانى جايلى سۇراۋ سالادى. الايدا ترامپ بۇل ءجۋرناليستتى ەلەمەي قويسا كەرەك. ەكى ساعات وتپەي جاتىپ، ەكى ەل باسشىسى بۇل حابار تۋرالى ارنايى جۋرناليستەردى قابىلداۋىنا تۋرا كەلگەن. بۇعان الەۋمەتتىك جەلىدە تاراپ كەتكەن سۋرەتتەر سەبەپ بولسا كەرەك.

CNN جۋرناليستەرى مەيرامحانانىڭ قىزمەتكەرلەرىنە سۇحبات جاساعاندا، ولار ەكى ەل باسشىلارىنىڭ نە تۋرالى تالقىلاعانىن ەستىمەگەنىن، قۇجات-فايلداردا نە سىر بارى تۋرالى بىلەيتىندەرىن ايتادى. ال، اقۇيدىڭ رەسمي وكىلى سپايسەر مالىمدەمە جاساپ: «ەكى ەل باسشىسى تاماقتاناردان بۇرىن، ورىندارىنىڭ قاۋىپسىزدىگى تۋرالى مالىمەت الدى، تاماق ۇستىندەگى ديالوگتار تەك مەيرامحانانىڭ قىزمەت كورسەتۋى مەن ءدامدى تاعامدارى تۋرالى عانا بولدى. الەۋمەتتىك جەلىلەردەگى ايتىلعانداي كۇردەلى تاقىرىپتار ايتىلعان ەمەس»، – دەپ ءتۇسىندىردى.

“The Qazaq Times”