گرۋزياداعى سايلاۋ: ازاماتتىق سوعىسقا قادام

گرۋزيا ۇمىتكەرلەر داۋىسىنىڭ تەڭ تۇسۋىنە بايلانىستى پرەزيدەنتتىك سايلاۋدىڭ ەكىنشى تۋرىنا دايىندالۋدا. بۇل – پوستكەڭەستىك كەزەڭدەگى سيرەك جاعداي.

«كۇش بىرلىكتە!» وپپوزيتسيالىق بىرلەستىگى گريگول ۆاشادزە جەڭىسكە جەتەدى دەپ سانايدى. ەگەر ۆاشادزە پرەزيدەنت لاۋازىمىنا يە بولسا، بۇرىنعى باسشى ميحايل سااكاشۆيليگە كەشىرىم جاسالۋى مۇمكىن. ال «گرۋزين ارمانى – دەموكراتيالىق گرۋزيا» پارتياسى تاۋەلسىز كانديدات سالومە زۋرابيشۆيلي شەشۋشى كەزەڭدە جەڭىپ شىعاتىنىنا سەنىمدى. قوس ۇمىتكەر اراسىنداعى «جارىستىڭ» ەكىنشى راۋند ناتيجەلەرى جەلتوقسانعا دەيىن ءمالىم بولادى. جاڭا سايلانعان پرەزيدەنتتى ۇلىقتاۋ راسىمىنەن كەيىن كونستيتۋتسيالىق وزگەرىستەر كۇشىنە ەنەدى، ولار گرۋزيانىڭ پارلامەنتتىك باسقارۋ جۇيەسىنە كوشۋىن اياقتايدى. سونداي-اق كەلەسى پرەزيدەنتتى 300 ادامنان تۇراتىن سايلاۋ القاسى سايلايدى.

گرۋزياداعى پرەزيدەنتتىك سايلاۋدىڭ ەكىنشى كەزەڭى "توسىن سىيعا" تولى بولماق. فوتو: www.bbc.com

ورتالىق سايلاۋ كوميسسياسىنىڭ الدىن-الا مالىمەتتەرى بويىنشا، 28 قازاندا وتكەن ءبىرىنشى تۋردا زۋرابيشۆيلي 38,64%-ى داۋىس جيناعان. بۇل ناتيجە گريگوري ۆاشادزەدەن بار بولعانى 0,9%-عا ارتىق. بيىلدان باستاپ جاڭا سايلانعان پرەزيدەنتتىڭ وكىلەتتىگى شەكتەلەتىنىنە قاراماستان، وسى سايلاۋ 2020 جىلعى پارلامەنتتىك سايلاۋ الدىنداعى ساياسي كۇشتەردىڭ دايىندىعى دەسەك تە بولادى. جانە ءبىرىنشى تۋردىڭ قورىتىندىسى بيلىكتەگى وپپوزيتسيالىق پارتيالار رەيتينگىسىنىڭ كورسەتكىشى.

«ازاماتتىق سوعىسقا قادام»

گرۋزياداعى سايلاۋعا قاتىستى ساياساتكەرلەر مەن حالىق پىكىرى ەكىگە ءبولىندى. وڭشىل بيلىك پارتياسى زۋرابيشۆيلي ەكىنشى تۋردا جەڭىسكە جەتۋى ءتيىس دەپ سانايدى. باسقارۋشى پارتيانىڭ دەپۋتاتى ەكا بەسەليا: «ءبىز ەلگە وتە قاتتى قاۋىپ ءتونىپ تۇرعانىن ءتۇسىنۋىمىز كەرەك. ەگەر وسى سايلاۋ ناتيجەسىندە رەۆانشيستىك كۇش بيلىككە كەلسە، بۇل ەل ءۇشىن وتە قاۋىپتى» – دەپ مالىمدەدى. ساياساتكەر گەدەۆان پوپحادزە: «ۆاشادزە بۇل سايلاۋدى جەڭسە، گرۋزيادا ازاماتتىق سوعىس باستالادى»، – دەيدى. ونىڭ ويىنشا، وپپوزيتسيالىق «ۇلتتىق قوزعالىس» پارتياسىندا رەۆانشيستىك كوڭىل-كۇي باسىم جانە ولاردىڭ كوزدەگەنى – گرۋزياعا سااكاشۆيليدى الىپ كەلىپ، بۇرىنعى جوعارى لاۋازىمدى شەنەۋنىكتەردى تۇتقىننان بوساتۋ.

گرۋزياداعى بيلىك اۋىسقاننان كەيىن سااكاشۆيلي ۇكىمەتىنىڭ كوپتەگەن بۇرىنعى شەنەۋنىكتەرىنە ايىپ تاعىلدى. ولاردىڭ قاتارىندا بۇرىنعى پرەمەر ۆانو مەرابيشۆيلي جانە ىشكى ىستەر ءمينيسترى باچو احالايا قاماۋعا الىنعان. ەكس-پرەزيدەنت سااكاشيليگە بىرنەشە ءىس بويىنشا ايىپ تاعىلىپ، ەلدەن قۋىلدى. گرۋزين پروكۋراتۋراسىنىڭ سااكاشۆيليدى ينتەرپولمەن حالىقارالىق ىزدەستىرۋى جانە وتانىنا ەكستراديتسيالاۋ تۋرالى جوسپارى ءساتسىز اياقتالعان. ەكىجاقتى قاراستىرار بولساق، ەكس-پرەزيدەنت ءوزىنىڭ اتىنا تاعىلعان ايىپتاۋعا «ابسۋرد، جالعان» دەگەن باعا بەردى.

«كۇش بىرلىكتە!» وپپوزيتسيالىق بىرلەستىگى گريگول ۆاشادزە جەڭىسكە جەتەدى دەپ سانايدى. فوتو: www.bbc.com

بيىلعى پرەزيدەنتتىك سايلاۋدىڭ ۇمىتكەرى ۆاشادزە سااكاشۆيليگە جانە باسقا دا جوعارى لاۋازىمدى تۇلعالارعا كەشىرىم جاساۋدى كوزدەپ وتىرعانى تۋرالى جوسپار گرۋزيا ۇكىمەتىندە قىزۋ تالقىعا ءتۇستى. وسىعان قاتىستى ادىلەت ءمينيسترى تەيا تسۋلۋكياني: «گريگول ۆاشادزە پرەزيدەنتتىك تاق ءۇشىن كۇرەسەدى دەپ ويلايمىن. ول سااكاشۆيليگە كەشىرىم جاساۋ ءۇشىن تاققا تالاسىپ وتىر»، – دەيدى. ۆاشادزە بۇعان دەيىن «يمەدي» تەلەكومپانياسىنا سۇحبات بەرگەندە سااكاشۆيلي جانە بۇرىنعى بيلىكتىڭ باسقا دا لاۋازىمدى تۇلعالارىنا قاتىستى كەشىرىم جاساۋ قۇقىعىن پايدالانعىسى كەلەتىنىن مالىمدەگەن. ونىڭ ايتۋىنشا، گرۋزياداعى ساياسي قۋدالاۋ توقتاتىلۋى ءتيىس.

بيلىك پارتياسىندا وپپوزيتسيا جوسپارى تۋرالى ءسوز قوزعالعاننان كەيىن، ەكس-پرەزيدەنت سااكاشۆيلي قىلمىستىق ءىستىڭ جالعان ەكەنىن جانە ەشقانداي كەشىرىمگە مۇقتاج ەمەستىگىن ايتتى. ول «رۋستاۆي-2» باعدارلاماسىندا: «ماعان نە ءۇشىن كەشىرىم كەرەك؟ ءسىز، بالكىم، مەنى بىرەۋمەن شاتاستىرىپ العان بولارسىز!؟»، – دەدى. سونداي-اق، سااكاشۆيلي گرۋزيا سوتى حالىق تاراپىنان قاتاڭ سىنعا ۇشىراعان باسقارۋشى پارتيا توراعاسى مەن ميللياردەر، «ادىلەتسىز باسشى» ءيۆانيشۆيليدىڭ ىقپالىنان ارىلعان جاعدايدا عانا بيلىك پەن حالىق الدىندا ادال ەكەندىگىن دالەلدەيتىنىن ايتتى.

«گرۋزين ارمانى – دەموكراتيالىق گرۋزيا» پارتياسى تاۋەلسىز كانديدات سالومە زۋرابيشۆيلي شەشۋشى كەزەڭدە جەڭىپ شىعاتىنىنا سەنىمدى. فوتو: www.bbc.com

وپپوزيتسيالىق توپتار ازاماتتىق سوعىس تۋرالى مالىمدەمەنى جالعان دەپ اتادى. گرۋزيا ۇلتتىق قوزعالىس فراكتسياسىنىڭ توراعاسى رومان گوتسيريدزە: «ادامداردى قانداي دا ءبىر تۇراقسىزدىقپەن جانە قاۋىپتەرمەن قورقىتپاڭىزدار. حالىق جالعان اقپاراتقا سەنىپ قالسا، ىشكى تۇراقسىزدىق ورنايدى. ال قازىرگى جاعدايدا بىزگە تۇراقسىزدىقتىڭ ەش قاجەتى جوق»، – دەدى. سايلاۋعا قاتىستى پىكىر بىلدىرگەن ساراپشىلاردىڭ ويىنشا، قازىرگى بيلىك سايلاۋالدى ۋادەلەرىن ورىنداي المايدى جانە ازاماتتاردىڭ ءومىر ءسۇرۋ دەڭگەيىن كوتەرە المايدى. ساراپشى، گيا حۋحاشۆيلي: «بيلىك بۇل تۇرعىدا مەملەكەت پەن حالىقتىڭ ەمەس، ءوزىنىڭ مۇددەسىن قورعايدى»، – دەيدى. ساراپشىنىڭ ايتۋىنشا، قازىرگى ۋاقىتتا ەشقانداي رەۆوليۋتسيالىق پەرسپەكتيۆالار جوق. سەبەبى، ەكى تاراپ حالىق الدىندا ىمىراسىز.

وپپوزيتسيا بيلىككە كەلسە، ميحايل سااكاشۆيليگە كەشىرىم جاسالۋى مۇمكىن. بىراق ەكس-پرەزيدەنت ەشقانداي كەشىرىمگە مۇقتاج ەمەستىگىن ايتتى. فوتو: www.bbc.com

P.S: كاكاچيا: «ءبىرىنشى تۋر ناتيجەسى: وپپوزيتسيا جەڭىسى! ەگەر «گرۋزين ارمانى – دەموكراتيالىق گرۋزيا» پارتياسى وسى سايلاۋدا ۇتىلسا، بۇل ونىڭ بەدەلىنە ەلەۋلى سوققى بولادى. بىراق مۇنىمەن ەشتەڭە اياقتالمايدى. ەڭ باستىسى –2020 جىلعى پارلامەنتتىك سايلاۋ. ول بيلىك پەن ۇكىمەتتە كىمنىڭ مىقتى ەكەنىن انىقتايدى».