وزبەكستان ارمياسى كىمدەرگە تاۋەلدى؟

بيلىك باسىنا شاۆكات ميريزيەەۆتىڭ كەلۋىمەن وزبەكستان ۇزاق جىلدار بويعى جابىق ەسىك ساياساتىن جاڭا باعىتقا بۇردى. سوڭعى ەكى جىلدا رەسمي تاشكەنت الىس-جاقىن شەتەلدەرمەن قارىم-قاتىناسىن ودان ارى جاقسارتتى. وسى ۋاقىت ارالىعىندا جۇزدەگەن جاڭا كەلىسىمدەرگە قول قويىلدى. سونىڭ ىشىندە اسكەري كەلىسىمدەر دە بار. بۇگىن ءبىز ءدال وسى سالاعا قىسقاشا توقتالۋدى ءجون كوردىك.

وزبەكستان ارمياسى الەمدىك رەيتينگ بويىنشا، ورتالىق ازياداعى ەڭ قۋاتتى اسكەري كۇشكە يە. بىراق بۇل اسكەري كۇش كىمدەرگە تاۋەلدى؟ وزبەك ارمياسى وسىنداي دارەجەگە وزدىگىنەن جەتتى مە؟ ارينە جوق.

سوڭعى ەكى جىلدا وزبەكستان ارمياسىن فرانتسيا جانە اقش اسكەري ماماندارى ارنايى دايىندىقتان وتكىزۋدە. پاريج بەن ۋاشينگتوننان كەلگەن ماماندار وزبەكستان مەرگەندەرى مەن ۇشقىشتارىنا ارنايى شەبەرلىك ساباقتارىن بەرۋدە.

وزبەك ارمياسىنىڭ اسكەري دايىندىعىمەن فرانتسيالىقتار مەن امەريكالىقتار اينالىسسا، اسكەري تەحنيكالاردى مودەرنيزاتسيادان وتكىزۋدىڭ ءبىر بولىگىن رەسمي تاشكەنت بەلارۋس ەلىنە سەنىپ تاپسىرعان. وزبەكستان 2017 جىلى بەلارۋسكە ءتورت ميگ-29 بومبالاۋشى ۇشاعى مەن ءتورت سۋ-24 شابۋىلداۋشى ۇشاعىن جوندەۋدەن وتكىزۋگە جىبەرگەن. ءدال وسى جىلى وزبەكستان قورعانىس مينيسترلىگى بەلارۋستىڭ 558-ءشى اۋە تەحنيكالارىن جوندەۋ زاۋىتىمەن مەموراندۋمعا قول قويعان. سول ۋاقىتتا وزبەكستان اسكەري تەحنيكالارىن جوندەۋدەن وتكىزۋ ءۇشىن رەسەي مەن بەلارۋس اراسىندا تالاس جۇرگەن. سەبەبى وزبەك ارسەنالىنىڭ باسىم كوپشىلىگى توزىعى جەتكەن كەڭەستەر وداعىنان قالعان اسكەري تەحنيكالاردان قۇرالعان. بۇل دەگەنىڭ رەسمي ماسكەۋ مەن مينسك ءۇشىن تاپتىرماس ولجا، قىرۋار قارجى.

وزبەكستان اسكەري تەحنيكالاردى جوندەۋدەن وتكىزۋ مەن جەكە قۇرامدى دايىنداۋدان بولەك قارۋ-جاراق جاساۋدا دا وزگە ەلدەرمەن بىرلەسىپ جۇمىس ىستەۋگە ءماجبۇر. سەبەبى اسكەري ونەركاسىپ سالاسىندا كادر تاپشى. قازىرگى تاڭدا قارۋ-جاراق شىعارۋدا، اسكەري تەحنيكاداردىڭ زاماناۋي ۇلگىلەرىن قۇراستىرۋدا وزبەكستان بيلىگى قازاقستان، رەسەي، تۇركيا سياقتى ەلدەرمەن بايلانىس ورناتقان.

"The Qazaq Times"