كەشە، اقش مەملەكەتتىك حاتشىسى مايك پومپەو امەريكالىق تەلە جۇرگىزۋشى حيۋ حيۋيتتكە بەرگەن سۇحباتىندا، قىتايعا قاراتا ەسكەرتۋ رەتىندە، كەز-كەلگەن ارانداتۋ ارەكەتتەرىنە قۇراما شتاتتىڭ قاتاڭ جاۋاپ بەرەتىنىن، كەز-كەلگەن ايماققا جاۋاپ بەرەتىنىن اتاپ ءوتتى. بۇل تۋرالى VOA جاڭالىقتار قىزمەتى حابارلادى.

ترامپ ۇكىمەتىنىڭ اقش-قىتاي اراسىنداعى باسەكەلەستىك قارىم-قاتىناستى تولىق سەزىنىپ وتىرعانىن ايتقان پومپەو، قىتايدىڭ كەيبىر ارەكەتتەر اقش-تىڭ قاۋىپسىزدىگىنە قاتەر ءتوندىرىپ وتىرعانىن ايتادى. ايتالىق، زياتكەرلىك مەنشىك قۇقىعىن ۇرلاۋ، ساۋدا تەڭسىزدىگى، وڭتۇستىك قىتاي تەڭىزىندەگى قايشىلىقتار، سونداي-اق، قىتايدىڭ عارىش سالاسى مەن اسكەري قۋاتىن دامىتۋ ىستەرىنىڭ ءبارى دە اقش-تىڭ ءتۇبىرلى مۇددەسىنە قاۋىپ توندىرەتىنىن ايتادى.

اتالعان سۇحباتتا، پومپەو قىتايداعى ازاماتتاردىڭ ءدىني سەنىم بوستاندىعىنىڭ تاپتالىپ جاتقانى تۋرالى دا ءسوز ەتەدى. ول شىنجاڭداعى مۇسىلمان ازشىلىقتاردىڭ «ۇيرەنۋ لاگەرلەرىنە» قامالىپ جاتقانىن جانە حريستيانداردىڭ قىسىم كورىپ وتىرعانىن العا تارتقان. «پرەزيدەنت ترامپ الدەقاشان ۇكىمەتتەن بۇل ماسەلەلەردى ەلەۋلى تۇردە شەشۋدى تالاپ ەتتى. بۇل ادام قۇقىقتارىن قۇرمەتتەمەيتىن ەلدەردىڭ بيلىگىن سىناپ قانا قويماي، ەسەسىنە، اقش پەن الەم ەلدەرىنىڭ ىقپالى ارقىلى تۇبىرىنەن شەشۋگە اسەر ەتەدى»، – دەدى پومپەو.

سوڭعى كەزدەرى، شىنجاڭداعى «ۇيرەنۋ لاگەرلەرى» الەمدىڭ قاۋىمداستىقتىڭ نارازىلىعىن قوزعادى. قۇراما شتات وسىعان بايلانىستى شىنجاڭنىڭ ۇكىمەت باسشىلارىنا جانە بەيجىڭدەگى كەيبىر لاۋازىمدى تۇلعالاردى ءوز سانكتسياسىنىڭ تىزىمىنە ەنگىزگەن بولاتىن. الايدا، قىتاي بيلىگى بۇل لاگەرلەردى ەكسترەميزمگە قارسى كۇرەسۋدىڭ ءادىسى رەتىندە كورسەتۋگە تىرىسىپ كەلەدى.

پومپەو وسىلارمەن قاتار دامۋشى ەلدەردى، اسىرەسە لاتىن امەريكاسىنداعى ەلدەرگە قىتايدىڭ ەكونوميكالىق شابۋىلىنان ساق بولۋ تۋرالى ەسكەرتتى. ول شي ءجينپيڭنىڭ باسشىلىعىمەن بەيجىڭ سوڭعى ءۇش-ءتورت جىلدا جاڭادان دامىپ كەلە جاتقان ەلدەردى «ءبىر بەلدەۋ، ءبىر جول» جوباسى ارقىلى ينۆەستيتسيالاپ وتىرعانى، لاتىن-امەريكاسىنداعى ەلدەردە دە 500 ملرد اقش دوللار كولەمىندە ينۆەستيتسيا سالۋى اقش-تىڭ ايماقتارداعى ىقپالىنىڭ ورىنىن الماستىرۋ ەكەنىن ايتقان.

اقش پەن قىتاي قازىر ساۋدا سوعىسىنىڭ ەڭ قىزۋ كەزەڭىندە تۇر، ءارى ءبىر-ءبىرىنىڭ تاۋارلارىنا جازالاۋشى تاريفتەردى ەنگىزدى. ال، ەكى ەل باسشىلارى 29 قاراشادا بۋەنوس-ايرەستە كەلىسسوز كەزدەسۋىندە جۇزدەسپەك.

“The Qazaq Times”