قاۋىپتى حات: اقش-تا لاڭكەستىككە ورىن جوق!

فبر اگەنتتەرى جۇما كۇنى فلوريدادا حيللاري كلينتون مەن باراك وباماعا جارىلعىش قۇرىلعىلارى بار ونداعان پاكەتتى جولداعان كۇدىكتىنى ۇستادى. بۇل تۋرالى CNN حابارلايدى.

كۇدىكتىنى دنق تالداۋىنىڭ كومەگىمەن تاپقان. اگەنتتىكتىڭ مالىمەتتەرى بويىنشا، ۇستالعان ادام پوشتا ارقىلى بومبا جولداعان جانە سول حاتى ارقىلى بيلىكتەگىلەرگە قوقان-لوقى كورسەتپەك بولعان. فبر ديرەكتورى كريستوفەر ۆرەي پوشتا ارقىلى جالپى سانى 13 جارىلىس قۇرىلعىسىنىڭ جولدانعانىن ايتتى. امەريكا ءباسپاسوز قۇرالدارى ۇستالعان ادامنىڭ وسى ۋاقىتقا دەينگى ارەكەتتەرىن تالداپ جازعان. 56 جاستاعى تسەزار سايوك اقش رەسپۋبليكالىق پارتياسىنىڭ مۇشەسى. 1991 جىلدان باستاپ ول ۇساق ۇرلىق، ەسىرتكى جانە الاياقتىق ىستەرى بويىنشا بىرنەشە رەت قاماۋعا الىنعان. ەندى كۇدىكتىگە «بەس فەدەرالدىق قىلمىس جاساپ، ەكس-پرەزيدەنتتەردى بوپسالادى جانە قاۋىپتى جارىلعىش زات جولدادى» دەگەن ايىپ تاعىلدى. سونداي-اق كۇدىكتىنىڭ دونالد ترامپ پەن اقش ۆيتسە-پرەزيدەنتى مايك پەنستىڭ كاريكاتۋرالىق سۋرەتتەرى جانە «CNN – پروۆوكاتور!» دەگەن ستيكەرى بار فۋرگونى دا تابىلعان. ادىلەت مينيسترلىگىنىڭ وكىلى سارا يسگۋر فلورەس تەرگەۋ جۇمىستارىنىڭ ءالى دە جۇرگىزىلەتىنىن جانە كىنالىلەر 48 جىلعا باس بوستاندىعىنان ايىرىلاتىن ايتتى.

New York City. Police presence seen outside the Time Warner Building where news station CNN is located. A bomb was found at the CNN offices.

اقش پرەزيدەنتى دونالد ترامپ: «كۇدىكتىنىڭ قاماۋعا الىنعانىنا قۋانىشتىمىن. ءبىزدىڭ قۇقىق قورعاۋشىلارىمىز كەرەمەت جۇمىس اتقاردى. مۇنداي لاڭكەستىككە مۇلدە ورىن جوق. ەشقاشان امەريكاداعى ساياسي زورلىق-زومبىلىققا جول بەرمەۋىمىز كەرەك. مەن پرەزيدەنت رەتىندە استىرتىن ارەكەتتەردى توقتاتۋ ءۇشىن ءبارىن جاسايمىن. كىنالىلەر قاتاڭ جازالاناتىن بولادى»، – دەدى. مۇنداي قاۋىپتى حات ترامپ، كلينتون مەن وبامادان بولەك وزگە دە لاۋازىمدى قىزمەتكەرلەرگە جولدانعان. بۇگىن اقش-تا تاعى دا جارىلعىش قۇرىلعىسىنىڭ تابىلعانى ءمالىم بولدى. ونىڭ ەكەۋى نيۋ-دجەرسي شتاتىنىڭ سەناتور-دەموكراتى كوري بۋكەرگە، ال تاعى بىرەۋى ۇلتتىق بارلاۋ ديرەكتورى دجەيمس كلەپپەرگە جولدانعان. نيۋ-يورك پوشتاسىنىڭ قىزمەتكەرلەرى تاپقان حات CNN تەلەارناسىنىڭ رەداكتسياسىنا جانە اكتەر روبەرت دە نيرونىڭ مەيرامحاناسىنان دا تابىلدى.

ترامپ اكىمشىلىگى ەكس-شەنەۋنىكتەرگە، ساياساتكەرلەرگە جانە جۋرناليستەرگە باعىتتالعان بارلىق ارەكەتتەردى تەرروريستىك اكت رەتىندە قاراستىراتىنىن مالىمدەگەن بولاتىن. نيۋ-يورك مەرى دە بولعان ءىستى «لاڭكەستىك» دەپ اتادى. قازىرگى ۋاقىتتا ۇنەمى قايتالاناتىن ىسكە «ىشكى تەرروريزم» دەگەن باعا بەرىلىپ، قاتاڭ تەكسەرۋ جۇمىستارى جۇرگىزىلىپ جاتىر.

"The Qazaq Times"