اقش حاشوگگي ولىمىنە قاتىسى بار ساۋديالىقتارعا سانكتسيا ەنگىزدى

اقش پرەزيدەنتى دونالد ترامپ ساۋد ارابياسى بيلىگىن قاتاڭ سىنعا الىپ، جۋرناليست جامال حاشوگگيدىڭ ولىمىنە قاتىسى بار دەگەن ساۋديالىق شەنەۋنىكتەرگە سانكتسيالار ەنگىزدى. ەندى ولارعا «ماگنيتتىك جاھاندىق اكت» جوباسى بويىنشا قۇراما شتاتتارىنا كىرۋگە تىيىم سالىنادى.
دونالد ترامپ ءوز سوزىندە: «حاشوگگيدىڭ ءولىمى ساۋد ارابياسىنىڭ بەدەلىنە نۇقسان كەلتىردى. ساۋد ارابياسىنىڭ حانزاداسىمەن حابارلاسقانىمدا، ول بۇل ىسكە ەش قاتىسى جوق ەكەنىن ايتتى. دەمەك، وعان باسقا ادامدار جاۋاپتى. تەرگەۋ ءىسى ءالى دە جالعاسىپ جاتىر. مىندەتتى تۇردە ءتيىستى شارا قولدانىلادى. كوپ ۇزاماي ناقتى اقپاراتا كول جەتكىزەمىز» – دەدى. ۋاشينگتون ەر-ريادتا باستالعان Future Investment Initiative ينۆەستيتسيالىق فورۋمىنا بويكوت جاريالاعان بولاتىن. وعان گەرمانيا، فرانتسيا، ۇلىبريتانيا جانە اقش دەلەگاتسيالارى كەلمەدى، الايدا رەسەيلىكتەر بۇل تاراپتان ءبولىنىپ، قاتىسۋشىلار سانىن كوبەيتتى.

ترامپ ۋاشينگتون مەن ەر-رياد قارىم-قاتىناسىنىڭ ۋشىقپايتىنىن جانە كورولدىككە قارۋ تاسىمالداۋدان باس تارتپايتىنىن ايتتى. جۋرناليستەردىڭ سۇراقتارىنا جاۋاپ بەرە وتىرىپ، اق ءۇي باسشىسى بۇل قىلمىسقا كىنالىلەردى «ۇلكەن قيىندىق» كۇتەتىنىن ايتتى. پرەزيدەنت مالىمدەمەسىنەن سوڭ اقش-تىڭ مەملەكەتتىك حاتشىسى مايك پومپەو كىنالى تاراپ بۇل جازامەن عانا شەكتەلمەيتىنىن ەسكەرتتى. «ءبىز ساۋد ارابياسى كورولدىگىمەن بەرىك سەرىكتەستىك قارىم – قاتىناستى قولدايتىن بولامىز. پرەزيدەنت تە، مەن دە بۇل جاعدايعا اشۋلىمىز، بىراق ءبىزدىڭ ساۋد ارابياسىمەن ورتاق ستراتەگيالىق مۇددەلەرىمىز وزگەرىسسىز قالادى» – دەدى مايك پومپەو. ال ساۋد ارابياسىنىڭ تاق مۇراگەرى مۇحاممەد بين سالمان وپپوزيتسيالىق جۋرناليست جامال حاشوگگيدىڭ ءولىمىن «جانتۇرشىگەرلىك قىلمىس» دەپ، تەرگەۋدەن سوڭ كىنالىلەردىڭ زاڭ الدىندا جاۋاپقا تارتىلاتىنىنا ۋادە بەردى. بىراق، تۇركيا پرەزيدەنتى ەرەجەپ تايىپ ەردوعان 23 قازاندا ساۋد ارابياسىنىڭ بيلىگى حاشوگگيدى قاساقانا جانە الدىن الا جوسپارلاپ ولتىرگەنىن مالىمدەگەن. تۇركيا مەن ەۋروپا وداعى ەلدەرى جۋرناليست ءولىمىن تەكسەرۋدى تالاپ ەتىپ وتىر.

ەسكە سالا كەتەيىك، جامال حاشوگگي 2 قازاندا ىستامبۇلداعى ساۋد ارابيا كونسۋلدىعىندا ءىزىم-عايىم جوعالىپ كەتكەن. بىرنەشە كۇننەن سوڭ مارقۇمنىڭ دەنەسى قالا ماڭىنان تابىلدى. وتكەن اپتادا ساۋد ارابياسى حاشوگگيدى كونسۋلدىقتا «قىلقىندىرىپ ولتىرگەنىن» مويىنداپ، حالىقارلىق قاۋىمداستىقتىڭ قاتاڭ سىنىنا ۇشىرادى. بۇل تاراپ «حاشوگگي ىسىنە» قاتىسى بار ون سەگىز ادامدى تۇتقىنعا الدى جانە جوعارى شەندى بەس كەڭەسشىنى لاۋازىمىنان ايىردى.

"The Qazaq Times"