قازان ايىنىڭ 23-ءى كۇنى تاشكەنت قالاسىنا رەسمي ىسساپارمەن اقش ساۋدا ءمينيسترى ۋيلبۋر روسس باردى. ول وندا وزبەكستان پرەزيدەنتى شاۆكات ميرزيەەۆپەن كەزدەستى. كەزدەسۋ بارىسىندا قوس تاراپ اقش پەن وزبەكستان اراسىنداعى ساۋدا-ەكونوميكالىق بايلانىس جونىندە كەلىسسوزدەر جۇرگىزدى.

كەلىسسوزدەردەن كەيىن اقش-وزبەكستان ساۋدا پالاتاسىنىڭ ءتورايىمى كەرولين لەمم امەريكا-وزبەكستان بيزنەس فورۋمىندا مالىمدەمە جاسادى. ول وندا: «كەشە ءبىز رەسەيدىڭ وزبەكستانمەن وتە ۇلكەن كەلىسىمگە كەلگەندىگىن ەستىدىك.  بىز ساۋدا-ينۆەستيتسيالىق بايلانىسىمىزدىڭ دەڭگەيىن ارتتىرۋ ءۇشىن  رەسمي تاشكەنتپەن ودان دا ۇلكەن كەلىسىم جاساۋدى ۇيعاردىق. اقش-تىڭ وزبەكستانمەن جاساعان مەموراندۋمى كەلىسىمنىڭ باسى عانا. قازىردىڭ وزىندە اقش كومپانيالارى وزبەكستان جوبالارىنا 9 ميلليارد دوللار قارجى قۇيۋعا دايىن» - دەپ مالىمدەدى.

بۇعان دەيىن تاشكەنتكە ۇزاق جىلدىق ۇزىلىستەن كەيىن رەسمي ىسساپارمەن رەسەي پرەزيدەنتى ۆلاديمير پۋتين بارعان. ونى شاۆكات ميرزيەەۆ اۋەجايدان كۇتىپ الىپ، «ۇلدەمەن-بۇلدەگە» وراماسا دا، ۇلكەن قۇرمەتپەن قارسى العان.  تاشكەنت باس قوسۋىندا ۆلاديمير پۋتين مەن شاۆكات ميرزيەەۆ 12 مەملەكەت ارالىق كەلىسىمگە قول قويعان. ونىڭ ىشىندە 27,1 ملرد دوللار ايماق ارالىق، 1,76 ميلليارد دوللار ساۋدا-ساتتىق، 25,3 ميلليارد دوللار ينۆەستيتسيالىق كەلىسىم قۇجاتتارى بار.

بۇدان بولەك قوس تاراپ وزبەكستان اۋماعىندا ورتالىق ازياداعى العاشقى اتوم ەلەكتر ستانتسياسىنىڭ قۇرىلىسىن باستاۋ جونىندە ۋاعدالاسقان. كەلىسىم بويىنشا، اەس قۇرىلىسى رەسەيدىڭ «روساتوم» كومپانياسىنىڭ قاتىسۋىمەن جۇزەگە اسىرىلادى دەپ كۇتىلۋدە.

ءدال قازىرگى جاعدايدا وزبەكستانمەن جاسالعان كەلىسىم جاعىنان اقش پەن رەسەيدى سالىستىرۋعا كەلمەيدى. بىراق اقش-تىڭ وزبەكستاندا جۇمىس ىستەپ جاتقان كومپانيالارى مەن ينۆەستيتسياسىن ايتاتىن بولساق، رەسمي ۋاشينگتوننىڭ تاشكەنتتى نازاردان شىعارماعانىن اڭعارۋعا بولادى. اقش 1998-2017 جىلدار ارالىعىندا وزبەكستانعا 1 تريلليون دوللار قارجى قۇيعان.  2018 جىلدىڭ توعىز ايىنداعى كورسەتكىش بويىنشا، ەكى ەل اراسىنداعى تاۋار اينالىمى 2 ەسەگە ءوسىپ، 332 ميلليون دوللاردى قۇراعان. قازىرگى ۋاقىتتا وزبەكستان اۋماعىندا اقش كومپانيالارىنىڭ قاتىسۋىمەن 210 كاسىپورىن جۇمىس ىستەۋدە. ءبىر سوزبەن ايتقاندا اقش پەن رەسەيدىڭ وزبەكستان ءۇشىن كۇرەسى بيلىك باسىنا شاۆكات ميرزيەەۆتىڭ كەلۋىمەن جاڭا دەڭگەيگە شىقتى.

جالپى، تاشكەنت تىزگىنىن شاۆكات ميرزيەەۆ ءوز قولىنا العالى بەرى وزبەكستان اقش-پەن دە رەسەيمەن دە قارىم-قاتىناسىن قايتا جاڭعىرتقان. ميرزيەەۆ پرەزيدەنت بولىپ سايلانا سالعان بەتتە العاشقى ءىسساپارىن ماسكەۋدەن باستاسا دا، ۋاشينگتونمەن اراداعى بايلانىسىن ۇزبەگەن. بۇل بايلانىس ونىڭ مامىر ايىندا ۋاشينگتونعا جاساعان ساپارىنان كەيىن ءتىپتى نىعايا تۇسكەن. ازىرگە رەسمي تاشكەنت الپاۋىتتار الپارىسىندا تەپە-تەڭدىكتى ۇستاپ تۇر. بولاشاقتا تارازىنىڭ باسى قاي جاققا اۋاتىنى بەلگىسىز.

"The Qazaq Times"