فوتو: ca-portal.ru

جاقىندا حالىقارالىق ۆاليۋتا قورى 2019 جىلعا ارنالعان ەكونوميكالىق بولجامىن جاريالادى.

بولجام بويىنشا، كەلەسى جىلى الەم ەكونوميكاسى بۇرىن سوڭدى بولماعان قيىندىقتارعا تاپ بولادى. حۆق مالىمەتىنشە، 2019 جىلى ساۋدا سوعىسى سالدارىنان الەمدىك ەكونوميكا 1,52 ترلن دوللار تابىسىنان ايىرىلادى. بۇل ءوز كەزەگىندە جاھاندىق نارىقتىڭ 17 پايىزعا قىسقارۋىنا جانە جالپى ىشكى ءونىمنىڭ 1,9 پايىزعا ازايۋىنا الىپ كەلەدى.

حالىقارالىق ۆاليۋتا قورى ساراپشىلارىنىڭ پىكىرىنشە، 2018-2020 جىلدارى ارالىعىندا الەمدىك ەكونوميكانىڭ جىلدىق ءوسىمى 3,7 پايىز بولادى. بىراق بۇل ءوسىم جىل وتكەن سايىن باياۋلاپ، 2022-2023 جىلدارعا قاراي 3,6 پايىزعا تۇراقتايدى. ياعني الەمدىك ەكونوميكا ۇزاق ۋاقىت رەتسەسسيالىق كەزەڭدە بولادى.

2014 جىلدان بەرى داعدارىستىڭ تەرەڭ تۇڭعيىعىندا كەلە جاتقان قازاقستان ءۇشىن حۆق-نىڭ بۇل بولجامى جاقسى ەمەس ەكەندىگى ايتپاسا دا تۇسىنىكتى شىعار. دەسە دە، «مۇناي ينەسىندە» وتىرعان ەلىمىزدى كەلەر جىلى نە كۇتىپ تۇر؟» دەگەن سۇراق كىمدى بولسا دا الاڭداتارى انىق. ەندى وسى سۇراققا جاۋاپ ىزدەپ كورسەك.

ساراپشىلار پىكىرىنشە، قازاقستان ەكونوميكاسى كەلەسى جىلى 2008-2009 جىلدارداعى داعدارىستاندا اۋىر قيىندىقتارعا تاپ بولادى. سەبەبى قازاقستان قاي ۋاقىتتا بولسا دا مۇناي باعاسى  مەن سىرتتان كەلەتىن ينۆەستيتسيالارعا تاۋەلدى. ال كەلەسى جىلى الەمدىك ەكونوميكالىق تەربەلىستە سىرتتان كەلەتىن ينۆەستيتسيالار كولەمى ازايىپ، مۇناي باعاسى قۇلدىراۋى مۇمكىن.

جالپى، سوڭعى ايلارى اقش-تىڭ قارجى-نەسي ساياساتىن كۇشەيتۋى دامۋشى ەلدەردىڭ ەكونوميكاسىنا وڭاي تيگەن جوق. ۋاشينگتوننىڭ قىسىمىنان ءبىرىنشى كەزەكتە ارگەنتينا مەن تۇركيا ەكونوميكاسى تەڭسەلدى. جوعارىدا اتالعان ەكى ەلدىڭ ەكەۋىنىڭ دە ۇلتتىق ۆاليۋتاسى قۇلدىراۋدىڭ الەمدىك رەكوردىن ورناتتى. قۇنسىزدانۋ مارافونىنىنان قازاقتىڭ تەڭگەسىدە قالىس قالعان جوق. ءبىزدىڭ ۇلتتىق ۆاليۋتامىز ءاپ-ساتتە رەسەي ءرۋبلى مەن قىتاي ءيۋانى باستاپ تۇرعان قۇلدىراۋ تىزىمىنە ەنىپ كەتتى.

"The Qazaq Times"