گەرمانيا ساۋد ارابياسىمەن قارۋ-جاراق ەكسپورتىن توقتاتتى

بەرلين ساۋد ارابياسىنا قارۋ-جاراق ەكسپورتىن ۋاقىتشا توقتاتتى. بۇل تۋرالى گەرمانيا كانتسلەرى انگەلا مەركەل ءباسپاسوز كونفەرەنتسياسىندا حابارلادى. 

انگەلا مەركەل ءوز سوزىندە: «ساۋديالىق جۋرناليست جامال حاشوگگيدىڭ ءولىمى كۇللى الەم ءۇشىن وتە قورقىنىشتى جانە جۇمباق جاعداي. ەندى قىلمىستىق ءىس تولىققاندى تەرگەلىپ، كىنالىلەر قاتاڭ جازالانۋى كەرەك. سول سەبەپتى قارۋ ەكسپورتىن توقتاتتىق. اتالعان وقيعا مەملەكەت اراسىندا عانا ەمەس، حالىقارالىق دەڭگەيدە تالقىلاناتىن بولادى»، – دەدى.

نەمىس بيلىگى ەكى ەل اراسىنداعى ەكسپورتتىق بايلانىستىڭ ۋاقىتشا توقتاتىلۋى ۇلكەن ەسكەرتۋ دەيدى. ولار قىلمىستىق ىسكە قاتىستى تەرگەۋدى جالعاستىرىپ، ءادىل شەشىم شىعارۋ كەرەك دەگەن تالاپ قويدى. ءجۋرناليستىڭ قازاسىنا بايلانىستى ساۋد ارابياسىنا گەرمانيا عانا ەمەس، وزگە دە مەملەكتتەر قاتاڭ ەسكەرتۋ جاساپ وتىر. اقش پرەزيدەنتى دونالد ترامپ «ساۋد ارابياسى بىزگە ساياسي وداقتاس مەملەكەت، الايدا ءجۋرناليستىڭ ءولىمى قاراما-قايشى ارەكەت»، – ەكەندىگىن ايتتى. ال بۇۇ-نىڭ ادام قۇقىقتارى جونىندەگى بيۋروسى تەز ارادا اشىق، ءارى ءادىل تەرگەۋ جۇرگىزۋدى تالاپ ەتتى.

ايتا كەتەيىك، جۋرناليست حاشوگگيدىڭ ىستامبۇلداعى كونسۋلدىقتا قازا بولعانىن ساۋد ارابياسىنىڭ ۇلتتىق تەلەارناسى حابارلادى. بۇل ىسكە قاتىستى كورولدىقتىڭ 18 ازاماتى تۇتقىنعا الىنىپ، 2 جوعارى لاۋازىمدى تۇلعاسى وتستاۆكاعا كەتتى. قازىرگى ۋاقىتتا ءالى دە تەرگەۋ جۇمىستارى جۇرگىزىلىپ جاتىر.

"The Qazaq Times"