اقش-تىڭ اۋعانستانداعى اسكەري قولباسشىسى كاداگارىنداعى جەرگىلىكتى اسكەري لاۋازىمدىلارمەن كەزدەسۋگە بارعان كەزدە تاليبان قارۋلى كۇشتەرى شابۋىل جاساعان. شابۋىلدا كانداگار پوليتسياسىنىڭ باستىعى ابدۋللا رازيحتى قامتىعان ءۇش اعا وفيتسەرى قازا تاپقان.   بۇل تۋرالى VOA اقپاراتتىق قىزمەتى حابارلادى.

جەرگىلىكتى باق وكىلدەرىنىڭ مالىمەتىنە قاراعاندا  اۋعانستانداعى اقش-تىڭ گەنەرالى سكوتت ميللەر كانداگار گۋبەرناتورى جانە وزگە دە رەسمي لاۋازىمدى تۇلعالارمەن كەزدەسۋگە بارعان. كەزدەسۋشىلەر تىكۇشاققا وتىرۋ كەزىندە قارۋلى شابۋىل بولعان. حاباردا جانە سكوتت ميللەردىڭ جاراقات الماعانى ايتىلادى.

ابدۋللا رازيح وسىدان بۇرىن دا بىرنەشە رەت تاليباننىڭ شابۋىل قاراۋىلىنا ءىلىنىپ، امان قالعان بولاتىن. الايدا، كەزەكتى شابۋىلدا كانداگاردىڭ گۋبەرناتورى جانە بارلاۋ ءبولىمىنىڭ ديرەكتورىمەن بىرگە قازا بولعان.  قازا بولعاندار اراسىندا ءبىر وپەراتور دا بار. ال، اقش-تىڭ ءۇش جاۋىنگەرى جاراقات العان.

ابدۋللا رازيحتىڭ ءولىمىن تاراپتار اۋعانستاندا تاليبانعا قارسى كۇرەستىڭ ۇلكەن شىعىنى دەپ باعالاعان. 2011 جىلى رازيك كانداگارداعى پوليتسيانىڭ باسشىسى بولىپ تاعايىندالعان. ءارى ول وندا تاليبانعا قارسى كۇرەستە اتى شىققان اعا وفيتسەر رەتىندە بەلگىلى. 2014 جىلى The New York Times باسىلىمى ونى «تاليبان مەن جاۋلارىنىڭ قورقىنىشى» دەپ اتاپ، كولەمدى ماقالا جاريالاعان ەدى.

تاليبان ۇيىمى وسىدان كەيىن ارنايى مالىمدەمە جاساپ، قارۋلى شابۋىلدى ءوز مويىنىنا الدى جانە شابۋىلدىڭ ابدۋللا رازيك پەن سكوتت ميللەرگە باعىتتالعانىن ايتتى.

اقش قارۋلى كۇشتەرى جاساعان مالىمدەمەدە، جاراقات العانداردىڭ جاعدايى بىرقالىپتى ەكەنىن، ال شابۋىل جاساۋشىلاردىڭ ولتىرىلگەنى ايتىلدى.

بۇگىن تاڭەرتەڭ اقش مەملەكەتتىك حاتشىسى وسىعان بايلانىستى مالىمدەمە جاساپ، اقش ۇكىمەتىنىڭ اۋعانستان حالقى مەن ۇكىمەتىن قورعاۋ ءۇشىن ونداعى مىندەتتەرىنە تاباندى بولاتىنىن قايتالادى.

 “The Qazaq Times”