وڭتۇستىك كورەياداعى قازاقستاندىقتارعا ايىپپۇل سالىنۋى مۇمكىن

وڭتۇستىك كورەياداعى وتانداستارىمىزعا 6,5 ميلليون تەڭگە كولەمىندە ايىپپۇل سالىنۋى مۇمكىن. بۇل تۋرالى dailynk.com حابارلادى.

جىل سايىن قازاقستاننان وڭتۇستىك كورەياعا جۇمىس ىستەۋگە، ساياحاتتاۋعا، ەم قابىلداۋعا باراتىن ادامدار سانى ارتىپ كەلەدى. ماسەلەن، 2016 جىلى 35 مىڭ ادام بارسا، بيىل بۇل بۇل كورسەتكىش 39 مىڭعا تاياعان. رەسمي مالىمەتتەر بويىنشا، قازىرگى ۋاقىتتا شامامەن 11 مىڭنان استام قازاقستاندىق ازاماتتار ەلدە زاڭسىز ءجۇر. اتالعان مەملەكەتتىڭ ەرەجەسىنە ساي، زاڭسىز جولمەن كۇنەلتىپ جۇرگەن ميگرانتتار قولعا تۇسكەن جاعدايدا، 6,5 ميلليون تەڭگە كولەمىندە ايىپپۇل سالىنادى.

ايتا كەتەر بولساق، بيىل قازاننان باستاپ وڭتۇستىك كورەيانىڭ يمميگراتسيالىق بيلىك وكىلدەرى پوليتسيامەن بىرلەسە وتىرىپ، ەلدە زاڭسىز جۇرگەن شەتەلدىك ميگرانتتاردى ۇستاۋ ءۇشىن ارنايى قاتاڭ رەيدتەر جۇرگىزۋدى قولعا الدى. رەيد كەزىندە ۇستالعاندارعا زاڭ بۇزۋشى ەسەبىندە ءتيىستى اكىمشىلىك شارالار قولدانىلادى. سونداي-اق 20 ميلليون كورەي ۆوناسى (6,5 ميلليون تەڭگە) كولەمىندە ايىپپۇل بەلگىلەنىپ، ەلدەن قۋىلادى. مۇنداي جاعدايدا اكىمشىلىك جازاعا تارتىلعان ادامدارعا 10 جىل ىشىندە وڭتۇستىك كورەيا شەكاراسىن اتتاپ باسۋعا قاتاڭ تىيىم سالىنادى.
قازىرگى ۋاقىتتا وڭتۇستىك كورەيا بيلىگى ەلدە ءبىر ايدان ارتىق جۇرگەن جانە ۆيزاسىنىڭ مەرزىمى وتكەن شەتەلدىك ازاماتتارعا «جاسىل ءدالىز» جوباسىن جاريالادى. ياعني بۇل رەجيم بويىنشا اتالعان قاتارداعىلار مەن جۇمىس ىستەۋگە رۇقساتى جوق شەتەلدىكتەرگە كەشىرىم بەرىلىپ، ايىپپۇل سالىنبايدى. سونىمەن قاتار ولار 6 اي ىشىندە ءوز مەملەكەتتەرىنە كەدەرگىسىز ورالا الادى.

"The Qazaq Times"