F-35 ۇشاعىندا قانداي اقاۋ بار: سۋپەر سوعىس ۇشاعى نە ءۇشىن ۇشۋدى توقتاتتى؟

الەمدەگى ەڭ جىلدام، تەحنيكالىق مۇمكىندىكتەرى مەن جاۋىنگەرلىك قابىلەتتەرى ەڭ جوعارى سوعىس ۇشاعى بولىپ سانالاتىن F-35 ساناۋلى ەلەرىندە عانا بار. الايدا، جاقىندا عانا اقش پەن ونىڭ وداقتاستارى زەرتتەپ جاساعان ۇشاقتىڭ بارلىق ەلدەردەگى ۇشۋىن توقتاتتى. بۇعان وڭتۇستىك كارولينا شتاتىنداعى سىناق كەزىندە F-35ۆ ۇشاعىنىڭ قۇلاۋى سەبەپ بولدى.

قارۋلى كۇشتەر ءوز مالىمدەمەسىندە، بارلىق F-35 ۇشاقتارى تەحنيكالىق تەكسەرىستەن وتكىزىلىپ جاتقانى ايتىلعان. مالىمەتتەرگە قاراعاندا، جانارماي جەتكىزۋ، جاعۋ قۇرىلعىلارىنداعى اقاۋ تەكسەرىستەن وتۋدە.

اتالعان سۋپەر ۇشاقتىڭ بىرقاتار تەحنيكالىق كەمشىلىكتەرى بار ەكەندىگى جايىندا وسىعان دەيىن دە تالاي رەت حابارلار تاراعان. اقش-تا بىرنەشە رەتكى سىناق كەزىندە ۇشقىش كابيناسىنا وتتەگى جەتىسپەۋ سالدارىنان اپاتتى جاعدايلار ورىن العان بولاتىن.

28 قىركۇيەكتە قۇلاعان F-35 ۇشاعىنىڭ اپات سەبەبىن تەكسەرۋ قورىتىندىسى جاريالانا سالىسىمەن وسى تۇردەگى بارلىق ۇشاقتار ۇشۋىن توقتاتتى. دەگەنمەن، جانارماي قۇرىلعىسىنداعى اقاۋ بارلىق ۇشاقتارعا ءتان ەمەس. ءبىر ءبولىم F-35 ۇشاقتارى اقاۋى بار جاعارماي جەتكىزۋ تۇتىكتەرى ورناتىلعان. الداعى ۋاقىتتا اقاۋى بار تۇتىك ورناتىلعان ۇشاقتار تەحنيكالىق جوندەۋدەن وتكىزىلەدى. ال، وزگەسى ۇشۋعا بەرىلەدى.

امەريكالىق اسكەري ءوندىرىستىڭ ءونىمى سانالاتىن F-35 ۇشاقتارىنا رەسەيلىك سۋ-35 ۇشاقتارىنان جوعارى سوعىس ۇشاقتارى عانا تەڭدەسە الادى. دەگەنمەن، رەسەي ت-50 ۇشاقتارىن الەمدەگى ەڭ وزىق سوعىسكەر دەپ ماقتان ەتەدى. الايدا، F-35-تىڭ كوپتەگەن قابىلەتتەرى ت-50 ۇشاعىندا كەزدەسە بەرمەيدى. ايتالىق، F-35 ۇشاعىنىڭ كەيبىر تۇرلەرى تىكۇشاققا ۇقساس ورنىنان تىك كوتەرىلە ۇشىپ، تىگىنەن قونا الادى. بۇل اسىرەسە تەڭىز كۇشتەرىنىڭ قابىلەتىن ارتتىرادى. سەبەبى، تىك ۇشىپ-قونا الاتىن سوعىس ۇشاعى سوعىس كەمەلەرىنىڭ كەز كەلگەنىنەن سەنىمدى سەرىك بولا الادى.

“The Qazaq Times”