ترامپ: قىتاي ءبىزدىڭ ارقامىزدا بۇگىنگە جەتتى، ەندى جاعداي باسقاشا بولادى

اقش پرەزيدەنتى دونالد ترامپ اق ءۇيدىڭ سەيسەنبى كۇنگى وتىرىسىندا قىتاي ۇكىمەتىنە قايتالاي ەسكەرتۋ جاساپ: «ەگەر قىتاي تارابى ءبىزدىڭ  قىتايلىق تاۋارلارعا بەلگىلەگەن تاريفتەرگە قارسى شارالار  قولداناتىن بولسا،  وندا اقش ءوز شاراسىن ەسەلەي تۇسەدى. قىتايدان يمپورت ەتىلەتىن تاۋارلارعا 267 ملرد دوللارعا دەيىن سالىق ەنگىزەتىن بولامىز»، – دەدى.

ول باق وكىلدەرىنە جاۋاپ بەرگەندە: «اقش-قىتاي قاتىناسى جامان ەمەس، بىراق، ولار وسىعان دەيىن قۇراما شتاتتان جىلىنا 500 ميلليارد دوللار الىپ كەتىپ وتىردى، ءبىز ەندى بۇنداي ىستەردىڭ قايتالانۋىنا جول بەرمەۋىمىز كەرەك. ەكى ەل اراسىنداعى ساۋدادان قىتاي ءار جىلى  200, 300, 400 ميللياردتاپ، ءتىپتى 500 ميللياردقا دەيىن پايدا تاۋىپ وتىردى. ولار ءبىزدىڭ ارقامىزدا وسى كۇنگە جەتتى، بۇلاي بولماعاندا قىتايدىڭ قازىرگى كۇنى جوق ەدى، ەندى جاعىداي باسقاشا  بولادى»، – دەدى.

ترامپ قۇراما شتاتتىڭ بۇۇ-داعى وكىلى نيككي حەيليدىڭ (Nikki Haley) وتستاۆكاعا كەتەتىنىن جاريالاۋمەن بىرگە قىتاي ۇكىمەتىنىڭ كەلىسسوزدەرگە دايىن ەمەس ەكەنىن دە ايتىپ ءوتتى. ول قىتاي ۇكىمەتىنە دەگەن نارازىلىعىن: «ءبىز ولاردىڭ سىلبىرلىعى ءۇشىن بىرنەشە رەت جوسپارلارىمىزدى وزگەرتتىك، ەكى ەل اراسىنداعى قاتىناستى تەك ءبىزدىڭ ءبىر جاقتىلى تالپىنىسىمىزبەن ساقتاپ وتىرۋعا بولمايدى، بارىس-كەلىس دەگەن قوس تاراپتىڭ بەلسەندى جۇمىس جاساۋىمەن بولادى، بىزدە ءوز پايدامىزدى تابۋىمىز كەرەك»، – دەگەن سوزدەرمەن ءبىلدىردى.

ەكى ەلدىڭ تەكە-تىرەسى ءالى جالعاسۋدا، پومپەونىڭ ازياداعى ءتورت ەلگە ساپارىنان كەيىن اقش پرەزيدەنتىنىڭ كەزەكتى مالىمدەمەسىن جاساۋى  بەيجىڭدەگى كەزدەسۋلەردىڭ ەكى ەل اراسىنداعى قايشىلىقتى شەشە الماعانىن كورسەتتى.

“The Qazaq Times”