قارۋلى كۇدىكتى فەتحۋللاح گۇلەننىڭ تۇرعىن ۇينە باسىپ كىرمەك بولعان

امەريكالىق باسىلىمداردىڭ حابارىنا قاراعاندا، تۇركيا ۇكىمەتى تەررورلىق توپتىڭ جەتەكشىسى دەپ تانيتىن فەتحۋللاح گۇلەننىڭ اقش-تاعى تۇرعىن ۇيىنە قارۋلى كۇدىكتى باسىپ كىرۋگە ارەكەتتەنگەن. الايدا، كۇدىكتى كۇزەت قىزمەتكەرلەرىنىڭ توسقاۋىلىنا ۇشىراعان. بۇل تۋرالى VOA جاڭالىقتار قىزمەتى حابارلادى.

فەتحۋللاح گۇلەننىڭ رەسمي وكىلىنىڭ ءبىرى،  كۇزەتشىلەردىڭ ەسكەرتۋ وعىنان كەيىن، قارۋلى كۇدىكتىنىڭ قاشىپ كەتكەنىن ايتقان. پەنسيلۆانيا پوليتسياسىنىڭ كۇدىكتىنى ىزدەستىرۋ ارەكەتى ءساتسىز اياقتالعان. دەگەنمەن، پوليتسيا تارابى تەكسەرۋدى جالعاستىرۋدا.

گۇلەننىڭ جاقتاستارى بۇل ارەكەتتىڭ ارتىندا تۇركيا ۇكىمەتىنىڭ تۇرعانىنا سەنىمدى ەكەندىكتەرىن جەتكىزىپ، مالىمدەمە جاسادى. ولار جانە تۇركيا پرەزيدەنتى ەردرعاننىڭ رەسمي مالىمدەمەشىسى گۇلەندى ەلگە قايتارۋ وپەراتسياسىن جۇزەگە اسىراتىندارىن ايتىپ سەس كورسەتكەنىن العا تارتتى.

1999 جىلى قۇراما شتاتقا قونىس اۋدارۋدان بۇرىن فەتحۋللاح گۇلەن قازىرگى تۇرىك بيلىگىنىڭ وداقتاسى بولعان. كەيىن تۇرىك ۇكىمەتى جاعىنان وعان تۇرىك سەكۋلياريزمىن بۇزۋعا تىرىستى دەگەن ايىپ تاعىلعان بولاتىن. ال، گۇلەن بولسا ەردوعان ۇكىمەتىن جەمقورلىقپەن ايىپتايدى.

ەردوعان بيلىگى فەتحۋللاح گۇلەننىڭ  2016 جىلعى توڭكەرىسكە قاتىسى بار دەپ قارايدى. سونداي-اق، ونى تەرروريست رەتىندە تۇركياعا قايتارىپ بەرۋدى قۇراما شتاتتان  تالاپ ەتىپ كەلەدى.

“The Qazaq Times”