وزبەكستاننىڭ تۇڭعىش پرەزيدەنتى، مارقۇم يسلام كاريموۆتىڭ ۇلكەن قىزى گۇلنارا جەكە رەيسپەن دۋبايعا ۇشىپ بارعان دەپ حابارلايدى «وزودليك» راديوسى.

1 قازاندا كاريموۆانىڭ قىزى يماننىڭ اتىنان اشىلعان ينستاگرام-اككاۋنتتا «گۇلنارا كاريموۆا تاشكەنتتە ءوزىنىڭ ۇيىندە» دەگەن اقپارات جاريالاندى.

​3 قازاندا كاريموۆانىڭ بىرنەشە جەكە كۇزەتشىلەرىمەن بىرگە اراب امىرلىگىنە ۇشىپ بارىپ، كۇندىزگى ساعات 14.00  شاماسىندا دۋبايداعى ەڭ قىمبات قوناق ۇيگە ورنالاسقانى بەلگىلى بولدى. "وزودليك" راديوسىنا بۇل اقپاراتتى جەكە رەيستى كۇتىپ الىپ، قوناق ۇيگە ورنالاستىرعان ادامدار راستادى. كەيىن اتى-ءجونىن قۇپيا ۇستاۋىن وتىنگەن قوناق ءۇي قىزمەتكەرى مارقۇم پرەزيدەنتتىڭ ۇلكەن قىزى شىن مانىندە تىركەلگەنىن حابارلادى.

جۋرناليستەر كاريموۆا توقتادى دەگەن بولمەگە تەلەفون سوققان. "گۇلنارا، بۇل ءسىز بە؟" دەگەن سۇراققا، تەلەفون تۇتقاسىن كوتەرگەن ايەل "يا، بۇل كىم؟" دەپ جاۋاپ بەرگەن. بىراق كىمنىڭ قوڭىراۋ شالعانىن بىلگەن ايەل تەلەفون تۇتقاسىن تاستاي سالعان.

دۋبايداعى VIP-قوناقتارعا قىزمەت كورسەتەتىن قوناق ءۇي جەتەكشىسى (رەداكتسيا ونىڭ اتى-ءجونىن جاريالامايدى) بەس بىردەي ليۋكس بولمەنى برونداعان شىن مانىندە گۇلنارا كاريموۆانىڭ ءوزى ەكەنىن ايتتى. بىراق ول VIP-قوناقتىڭ قاي ەلدىڭ ازاماتى ەكەنىن، جاسىن، سىرتقى كەلبەتىن سيپاتتاپ بەرۋدەن باس تارتتى.

– ءبىزدىڭ VIP-قوناقتار وزبەكستان ازاماتتارى ەمەس. ولاردىڭ ازاماتتىعى باسقا. سوسىن ول يسلام كاريموۆتىڭ قىزىنان الدەقايدا كىشى، – دەدى ول.

وسىنىڭ الدىندا وزبەكستاننىڭ باس پروكۋراتۋراسى گۇلنارا كاريموۆانىڭ تۇرمەدەن شىققانى جونىندەگى اقپاراتتى تەرىسكە شىعارعان.

گۇلنارا كارىموۆانىڭ ۇستىنەن قىلمىستىق ءىس 2015 جىلى قوزعالعان. ءدال وسى جىلى تاشكەنت قالالىق سوتى ونى «اسا ءىرى كولەمدە قارجى جىمقىرۋ»، «بوپسالاۋ»، «سالىقتان جالتارۋ» ايىپتارى بويىنشا كىنالى دەپ تانىپ، بەس جىلعا باس بوستاندىعىنان ايىرعان.

2017 جىلدىڭ شىلدە ايىندا وزبەكستان باس پروكۋراتۋراسى گۇلنارا كارىموۆانىڭ ۇستىنەن تاعى بىرنەشە قىلمىس بويىنشا ءىس قوزعالعاندىعىن مالىمدەدى. جاڭادان تاعىلعان ايىپ بويىنشا، ەكس-پرەزيدەنت قىزى وزبەكستانعا 2 ملرد دوللار كولەمىندە زيان كەلتىرگەن. وزبەكستان رەسمي ورگاندارىنىڭ بۇل مالىمدەمەسىنەن كەيىن گۇلنارا كارىموۆانىڭ الەمنىڭ 12 ەلىندەگى بانك شوتتارى مەن جىلجىمايتىن مۇلىكتەرى بۇعاتتالعان.

"The Qazaq Times"