ناتو-نىڭ جەلىلىك سوعىسىن اقش جۇرگىزۋى مۇمكىن

ناتو 2014 جىلى جەلىلىك سوعىستى (عالامتورداعى شابۋىل جانە قورعانىس) قۇرلىق، تەڭىز جانە اۋە سوعىستارىمەن قاتار ءمان بەرەتىنىن ءبىلدىردى. بىراق، وسىعان دەيىن جەلىلىك سوعىسقا بايلانىستى شارالار مەن جوسپارلارى تۋرالى مالىمەت تاراتپاعان.

جاقىندا پەنتاگون لاۋازىمدىلارى بۇعان بايلانىستى دەرەكتىڭ ۇشىن شىعاردى. ولاردىڭ ايتۋىنشا ەگەر قۇراما شتات تارابى ناتو-نىڭ ۇسىنىسىن قابىل السا، وندا ناتو اقش-تىڭ جەلىلىك شابۋىلداۋ جانە قورعانىس جەلىسىنىڭ مۇمكىندىكتەرىن پايدالانباق. بۇل تۋرالى VOA جاڭالىقتار قىزمەتى حابارلادى.

اقش قورعانىس مينيسترلىگى حالىقارالىق قاۋىپسىزدىك ماسەلەلەرى جونىندەگى حاتشىسى ۆيلبارجە، پەنتاگون باسشىسى جەيمس مەتتيسپەن بىرگە ەۋروپاعا جاساعان ساپارى كەزىندە اتالعان ماسەلە تۋرالى جۋرناليستەرگە جاۋاپ بەردى. «ءبىز الداعى ۋاقىتتا رەسمي تۇردە حابارلايتىن بولامىز، ەگەر قۇراما شتات ماقۇلدىعىن بەرسە، ناتو سول ارقىلى جەلىلىك سوعىس مۇمكىندىكتەرىن قامتاماسىز ەتۋگە دايىن»، – دەدى ۆيلبارجە.

ناتو-عا مۇشە مەملەكەتتەردىڭ جاقىندا وتكەن جينالىسى كەزىندە ناتو-نىڭ جەلىلىك وپەراتسيالارىن ۇيلەستىرۋ ءۇشىن ۇيىمعا جاڭا ورتالىق قۇرىلاتىنى بەلگىلى بولعان ەدى. بۇعان قوسا، ۇيىمعا مۇشە مەملەكەتتەردىڭ جەلىلىك مۇمكىندىكتەرى مەن بىرىڭعاي ارەكەت ەتۋدى قالاي ورتاقتاستىرۋ ىستەرىن تالقىلاعان بولاتىن.

ناتو مۇشەلەرى اراسىندا قۇراما شتاتتار، ۇلىبريتانيا، گەرمانيا، نورۆەگيا، يسپانيا، دانيا جانە نيدەرلاندى بىلتىر عانا ورتاق اسكەري كيبەرقاۋىپسىزدىك قاعيداسىن جاساعان ەدى.

“The Qazaq Times”