ارمەنيا بيلىگىندە ساياسي رەزونانس تۋعىزعان پاشينيان ءتورت ايدا نە تىندىردى؟

جاقىندا ارمەنيا پرەمەر-ءمينيسترى نيكول پاشينيان مەرزىمىنەن بۇرىن پارلامەنتتىك سايلاۋ وتكىزەتىنىن مالىمدەدى. پاشينياننىڭ بۇل شەشىمى حالىق اراسىندا قىزۋ تالقىعا اينالدى. لاۋازىمدى قىزمەتكە كەلگەنىنە بار-جوعى بەس ايعا جۋىقتاعان ول وسى ۋاقىت ىشىندە نە تىندىرىپ ۇلگەردى؟ ساراپتاپ كورەلىك.

1. «گۇلدەنگەن ارمەنيا» جانە «داشناكتسۋتيۋن» پارتياسى ۇسىنعان ۇكىمەت مينيسترلەرى مەن گۋبەرناتورلاردى جۇمىستان بوساتۋعا نۇسقاۋ بەردى.
2. بيلىكتى اسىرا ناسيحاتتاپ، استىرتىن ارەكەتتەردى جاسىرىپ قالۋمەن اينالىساتىن «ارمەنيا» تەلەارناسىنىڭ باسشىلارىن ورنىنان الدى.
3. قورعانىس ءمينيسترىنىڭ ورىنباسارى، گەنەرال مانۆەل گريگوريان، ونىڭ ايەلى مەن ۇلى ەچميادزينگە ارميان سولداتتارىنا گۋمانيتارلىق كومەك بەرگەنى جانە قارۋدى زاڭسىز ساقتاعانى ءۇشىن تۇتقىنداۋ تۋرالى شەشىم شىعاردى.
4. پرەزيدەنتتىك كۇزەت قىزمەتىنىڭ بۇرىنعى باسشىسى سارگسيان-ۆاچاگەل كازارياننىڭ ۇيىنە ءتىنتۋ جۇرگىزىپ، مەملەكەتكە تيەسىلى قارجىنى قايتاردى.
5. ەكس-پرەزيدەنت روبەرت كوچارياننىڭ سالىق تولەۋدەن جالتارعان «سپايكا» كومپانياسىن تەرگەۋگە الدى. وسى ءىس بويىنشا ەرەۆاندا 2008 جىلعى 1 ناۋرىزدا باستالىپ، اياقسىز قالعان تەرگەۋدى قايتا باستادى. ناتيجەسىندە كوچاريان رف-عا باس ساۋعالاۋعا ءماجبۇر بولدى.
6. ارمەنيا تەرگەۋ كوميتەتى مەن كاسساتسيالىق سوتىنداعى بىلىقتاردى اشكەرەلەپ، جاڭا كادر تاعايىندادى.
7. باس شتاب، شەكارا جانە قۇرلىق اسكەريلەرىنىڭ باسشىلىعى اۋىستى. سونداي-اق، تاۋلى قاراباقتاعى كۇش قۇرىلىمدارى ءوز جۇمىسىن توقتاتتى.
8. قىزمەتتىك وكىلەتتىگىن اسىرا پايدالانعانى ءۇشىن اۋىلدىق قاۋىم باسشىلارىنا قارسى 71 قىلمىستىق ءىس قوزعالدى.
9. پرەمەر-مينيستر پاشينياننىڭ ساپارىنان كەيىن ەكولوگيالىق پروبلەمادان كوز اشپاعان سيۋنيكسك وبلىسىنىڭ باسشىلىعى قىزمەتىنەن قۋىلدى.
10. ارميانداردىڭ شەت ەلدەن ورالۋىن جۇزەگە اسىراتىن «ارمەنياداعى جۇرەك» جوباسى ىسكە استى.
11. ادىلەتسىز سوتتىڭ «ارقاسىندا» جۇگەنسىز كەتكەن 30-عا تارتا قاندىقول قاراقشىلاردىڭ ۇستىنەن قايتا ءىس قوزعاپ، ءۇيىن ءتىنتىپ شىقتى. وسىدان كەيىن ولاردىڭ باسىم بولىگى ەلدەن قۋىلدى.
12. رف-داعى لدپر پارتياسىنىڭ دەپۋتاتى ۆلاديمير ساۆەلەۆ پەن جيرينوۆسكيدىڭ ماڭىزدى اڭگىمەسى ارقىلى ارمەنيانىڭ ازىربايجانعا قاتىستى تاۋلى قاراباقتى قايتارۋ تۋرالى كوپتەن كۇتكەن ۇسىنىسىنا قول جەتكىزدى.
13. فەيسبۋكتە تىكەلەي ەفيرگە شىعۋ ارقىلى شەندىلەر مەن حالىق اراسىندا قارىم-قاتىناس جاساۋدى داستۇرگە اينالدىردى. سونداي-اق، فەيسبۋك جەلىسىندە «پاشينيانمەن تىكەلەي سۇحبات» تاقىرىبىندا قارپايىم حالىقتىڭ ساۋالدارىنا جاۋاپ بەردى.
14. باسقا ەلدەرگە اسكەرگە بارۋدان باس تارتقان بارلىق جىگىتتەرگە راقىمشىلىق (امنيستيا) جاريالاپ، ولاردى وتانىنا قايتىپ ورالۋعا جانە قىزمەت ەتۋگە شاقىردى.
15. ءوزىنىڭ بارلىق اپپاراتى مەن ۇكىمەتىن «Applە»-ءدىڭ ورنىنا وتاندىق ءوندىرىس «ArmTab» كومپيۋتەرلەرىمەن جۇمىس ىستەۋگە كوشىردى.
16. وليگارح سامۆەل كاراپەتيانعا تيەسىلى «تاشير Group» كومپانياسىمەن كەلىسىم جۇرگىزىپ، جاعدايى تومەن وتباسىلاردىڭ ەلەكترو-ەنەرگيا باعاسىن تومەندەتتى.
17. جوعارى ءۆولتتى ەلەكتر جەلىلەرىن رەتتەۋمەن اينالىساتىن جقك-مەن كەلىسىمشارتتى بۇزىپ، «تاشير Group» كومپانياسىن مەملەكەت قاراماعىنا وتكىزدى.
18. «گازپروم ارمەنيا» كومپانياسى تابىسى از وتباسىلار ءۇشىن گاز باعاسىن 20%-عا تومەندەتتى. جەڭىلدەتىلگەن تاريف مەرزىمىنەن بۇرىن سايلاۋ ارقىلى ءبىر جىلعا بەلگىلەندى.
19.  سايلاۋ كودەكسىنە تۇزەتۋلەر ەنگىزدى.
20. ۇقشۇ جانە ەاەو-مەن ىنتىماقتاستىقتى كۇشەيتۋ تۋرالى قۇجاتتارعا قول قويدى.
21. رەسەي فەدەراتسياسىنىڭ فسب كۇشتەرىنىڭ ورنىنا تۇركيا جانە ازىربايجانمەن شەكارالىق ماسەلەلەردى رەتكە كەلتىردى. تۇركيا شەكاراسىنداعى جاعدايدى ءوز باقىلاۋىنا الۋعا قول جەتكىزدى.

ءتۇيىن

پاشينيان بيلىككە كەلگەن كەزدەن باستاپ 29 رەفورمانى جۇزەگە اسىرىپ ۇلگەرگەن. ءىرى سۋپەرماركەتتەرگە بويكوت جاريالاۋ ارقىلى جۇگەنسىز كەتكەن باعانى تومەندەتتى. سونداي-اق شەتەلدىك جانە وتاندىق كومپانيالاردىڭ استىرتىن ارەكەتتەرىن انىقتادى. تاعىسىن تاعى. ارمەنياعا «باق بوپ قونعان» نيكول پاشينيان ادىلەتتىك ورناتۋدى رەاليستىك باعىتتا جۇزەگە اسىردى. سايلاۋالدى جاتتاندى سوزبەن ەمەس، دە-فاكتولىق تۇرعىدا ارەكەت ەتتى. الايدا ارمەنيا جۇرتى ءۇشىن باقىتقا كەنەلۋ ۇزاققا سوزىلعان جوق. جاقىندا پارلامەنتتە ن.پاشينيان: «قازىر مەن ارىپتەستەرىمىزدىڭ داعدارىستى قالاي ەڭسەرۋ كەرەكتىگى تۋرالى ۇستانىمىن بىلۋگە تىرىسامىن. مەنىڭشە، ءبىز كەزەكتەن تىس سايلاۋ وتكىزۋ تۋرالى كونسەنسۋسقا كەلىسىم بەرەمىز. ەگەر پرەمەر سايلانباسا، مەرزىمىنەن بۇرىن پارلامەنتتىك سايلاۋ وتكىزۋ كەرەك»، – دەپ مالىمدەدى.

5 ايعا جۋىق ۋاقىتتىڭ ىشىندە ءوز مەملەكەتىن «قوقىستان» تازارتىپ ۇلگەرگەن پاشينياندى جاقتاۋشى حالىق سانى تولاسسىز ارتىپ كەلەدى. ارمەنيا عانا ەمەس «ساياسي دومينەننىڭ» تىندىرعان ىستەرى تالايدى تاڭداي قاقتىردى. ءبىر شەكپەننەن شىققان مەملەكەتتەر اراسىندا تاريحي رەزونانس تۋعىزدى. راسىمەن، نيكول پاشينيان پوستكەڭەستىك مەملەكەتتەردىڭ اراسىنان العاشقى بولىپ ساياسي جۇيەگە وزگەرىس ەنگىزگەن باسشى. ەندىگى كەزەك كىمدە؟..

"The Qazaq Times"