فوتو: lanouvellerepublique.fr

بىرىككەن شتاتتار ءسۇريا اراب رەسپۋبليكاسىنا ەكونوميكالىق قاتاڭ سانكتسيا سالاتىنىن ايتىپ، ەسكەرتۋ جاسادى. بۇل تۋرالى اقش-تىڭ ءسۇريا جونىندەگى ارنايى وكىلى دجەيمس دجەففەري رەيتەر اگەنتتىگىنە بەرگەن سۇحباتىندا مالىمدەدى، - دەپ حابارلايدى lanouvellerepublique.fr.

ارنايى وكىل اقش-تىڭ سۇرياعا سالۋدى ويلاستىرعان سانكتسياسىنىڭ يران ۇلگىسىندە جوسپارلانعانىن دا اتاپ ءوتتى. ونىڭ سوزىنشە، ەگەر شام (داماسك) بيلىگى ەلدىڭ جاڭا كونستيتۋتسياسىمەن جۇمىس ىستەمەيتىن بولسا، ۋاشينگتون ەكونوميكالىق قىسىمدى كۇشەيتەدى. «ەگەر ءسۇريا رەجيمى وسىلاي ىستەمەيتىن بولسا، وندا ءبىز 2015 جىلعا دەيىن يرانعا قارسى قانداي ساياسات ۇستانساق، ءدال سولاي ارەكەت ەتۋگە قۇقىلىمىز دەپ ەسەپتەيمىز. ءبىز بۇنى ەۋروپا وداعى ارقىلى جاسايمىز. ءبىز بۇنى ءبىزدىڭ ازيالىق وداقتاستارىمىز ارقىلى ىستەيمىز»، - دەگەن د.دجەففەري ءتىپتى بۇۇ قاۋىپسىزدىك كەڭەسىنىڭ ءوزى بىرىككەن شتاتتاردى وسى ويىنان قايتارا المايتىنىن ايتتى.

“The Qazaq Times”