رەسەي پرەزيدەنتى ۆلاديمير پۋتين مەن يزرايل پرەمەر-ءمينيسترى بينيامين نەتانياحۋ.

رەسەي پرەزيدەنتى ۆلاديمير پۋتين مەن يزرايل پرەمەر-ءمينيسترى بينيامين نەتانياحۋ ءسۇريادا اپاتقا ۇشىعان «يل-20» ۇشاعىنا بايلانىستى تەلەفون ارقىلى سويلەستى.

ءيزرايلدىڭ «9-كانال» تەلەارناسىنىڭ مالىمەتىنشە، قىركۇيەك ايىنىڭ 18-ءى كۇنى ۆلاديمير پۋتين مەن بينيامين نەتانياحۋ تەلەفون ارقىلى سويلەسكەن. سويلەسۋ بارىسىندا نەتانياحۋ پۋتينگە «يل-20» بورتىندا بولعان 15 ادامنىڭ قازاسىنا قايعىرا كوڭىل ايتقان جانە يران اسكەرىنىڭ ءسۇريا اۋماعىندا بولۋىنا قارسى ەكەندىگىن جەتكىزگەن.

بۇدان بولەك يزرايل پرەمەرى رەسەي پرەزيدەنتىنە قاجەت بولعان جاعدايدا يزرايل اسكەري اۋە كۇشتەرىنىڭ باسشىسى ماسكەۋگە يل-20 ۇشاعىنىڭ اپاتقا ۇشىراۋىنا قاتىستى دەرەكتەردى جەتكىزىپ بەرۋگە دايىن ەكەندىگىن ايتقان.

ەستەرىڭىزگە سالايىق، قىركۇيەك ايىنىڭ 17-ىنەن 18-ىنە قاراعان ءتۇنى جەرورتا  تەڭىزىندە رەسەيدىڭ يل-20 بارلاۋ ۇشاعىن ءسۇريانىڭ س-200 اۋە قورعانىس جۇيەسى اتىپ تۇسىرگەن. ءسۇريا تاراپى تاراتقان مالىمەت بويىنشا، ءدال وسى ۋاقىتتا لاتاكيانى يزرايل ۇشاقتارى بومبالاپ جاتقان جانە رەسەي ۇشاعىنا اتىلعان زىمىرىن نەگىزىندە يزرايل ۇشاقتارىنا باعىتتالعان.

"The Qazaq Times"