ۋكراينا رەسەيمەن اراداعى دوستىق كەلىسىمشارتىن بۇزدى

ۋكراينا پرەزيدەنتى پەترو پوروشەنكو ۋكراينا مەن رەسەي اراسىنداعى دوستىق، ىنتىماقتاستىق جانە سەرىكتەستىك كەلىسىمىنىڭ كۇشىن جويۋ تۋرالى جارلىققا قول قويدى، - دەپ حابارلايدى trt.net.tr.

كۇشى جويىلعان كەلىسىمگە 1997 جىلى قول قويىلىپ، ول ەكى ەل اراسىنداعى قۇجاتتاردىڭ ماڭىزدىسى ءارى ەڭ باستىسى بولىپ كەلگەن. سوندىقتان دا، وسى قۇجاتتىڭ اياسىندا اتالعان ەكى ەل «ستراتەگيالىق سەرىكتەس» رەتىندە تانىلىپ كەلگەن-ءدى. ەندى، ۋكراينا پرەزيدەنتى پوروشەنكو قول قويعان جارلىق وسى ماڭىزدى قۇجاتتىڭ كۇشىن جويدى. بۇعان دەيىن ۋكراينانىڭ سىرتقى ىستەر ءمينيسترى پاۆەل كليمكين ۋكراينانىڭ رەسەيمەن اراداعى بارلىق كەلىسىمشارتتاردى قايتا قاراۋعا باعىتتالعان ناقتى جوسپارى بار ەكەنىن، سونىڭ اياسىندا كيەۆتىڭ حالىقارالىق سوتتاعى پوزيتسياسىن ساقتاۋ جوسپارلانعانىن مالىمدەگەن ەدى.  «رەسەي فەدەراتسياسىمەن اراداعى بارلىق كەلىسىمشارتتاردى تەكسەرۋ ءبىزدىڭ كەلىسىمشارتتىق بازامىزدى تولىقتاي قايتا قاراۋىمىزدى بىلدىرمەيدى. ونىڭ ارتىندا ۇلكەن ستراتەگيا بار»، - دەگەن بولاتىن پ.كليمكين.

مينيستر سول كەزدە ۋكراينانىڭ رەسەيمەن اراداعى دوستىق، ىنتىماقتاستىق جانە سەرىكتەستىك كەلىسىمىنىڭ ەشقاشان ۇزىلمەگەنىن اتاي كەلە: «رەسەيمەن اراداعى كەلىسىمشارتتىق-قۇقىقتىق بازا تولىقتاي قايتا تەكسەرۋدەن وتكىزىلەدى. ءاربىر كەلىسىمشارتتىڭ سوڭىندا ونىڭ قالاي اياتالاتىنى تۋرالى ەرەجە بار. ءارى بىزدە ءوزىمىزدىڭ ىشكى جوسپارلارىمىز جەتەدى. ەگەر، ولاردى جاريالايتىن بولساق، رەسەي ونى سوت ىستەرىندە بىزگە قارسى قولداناتىن بولادى»، - دەگەن ەدى. ەندى، سول جوسپارلارىنىڭ جەمىسى رەتىندە،  ۋكراينا تاراپى رەسەيمەن اراداعى دوستىق، ىنتىماقتاستىق جانە سەرىكتەستىك كەلىسىمىنە نۇكتە قويدى.

“The Qazaq Times”