كيم جوڭ ۋن ترامپتى ەكىنشى رەت كەزدەسۋگە ۇسىنىس ەتتى. فوتو: VOA.

اق ءۇي دۇيسەنبى كۇنى مالىمدەمە جاساپ، سولتۇستىك كورەيا باسشىسى كيم جوڭ ۋن (كيم چەن ىن/Kim Jong un) اقش ۇكىمەتىنە حات جولداپ، پرەزيدەنت ترامپپەن تاعى ءبىر مارتە كەزدەسۋ تۋرالى ءوتىنىش بىلدىرگەن. بۇل تۋرالى «ۋاشينگتون پوست» حابارلادى.

اق ءۇي مالىمدەمەشىسى سارا ساندەرس ءباسپاسوز ماسليحاتى كەزىندە كيم جوڭ ۋن جولداعان حاتتىڭ قىزۋ ىنتالى ءارى جىلى سوزدەرمەن جازىلعانىن ايتتى. ءارى، بۇل حات كورەي تۇبەگىندەگى يادرولىق قارۋسىزدانۋ ماسەلەسى تۋرالى كەلىسسوز جۇرگىزىپ جاتقان ۋاشينتون مەن پيوڭياڭ اراسىنداعى توڭنىڭ ءجىبۋى دەپ باعالادى.

ترامپ ۇكىمەتى سوڭعى كەزدەگى سولتۇستىك كورەيامەن بولعان كەلىسسوز پروگرەسكە باسا نازار اۋداردى. ايتالىق، يادرولىق قارۋسىزدانۋدان تارتىپ، سولتۇستىك كورەيادا قاماۋعا الىنعان امەريكالىقتاردى بوساتۋ ىستەرىندە جاڭا ناتيجەلەردى قولعا كەلتىرگەنى شىن.

جەكسەنبى كۇنى ترامپ ءوزىنىڭ الەۋمەتتىك جەلى پاراقشاسىندا سولتۇستىك كورەياعا قاراتا جىلى لەبىزگە تولى سوزدەرىن ارناعان ەدى. وندا ترامپ پيوڭياڭداعى اسكەري شەرۋدە بالليستيكالىق زىمىرانداردىڭ بولماعانىن كحدر بيلىگىنىڭ بەيبىتشىلىككە دەگەن ناقتى قادامى دەپ باعالاعان.

“The Qazaq Times”