اقش ارمياسى جاپونيانىڭ قاۋىپسىزدىگىن قورعاۋعا كەلىسىم بەردى

10 اقپان كۇنى اقش پرەزيدەنتى دونالد ترامپ ساپارلاي كەلگەن جاپونيانىڭ پرەمەر-ءمينيستىرى شيندزو ابەمەن (سيندزو ابە) كەلىسسوز وتكىزدى. كەلىسسوز بارىسىندا ەكى تاراپ، ساۋدا-ەكونوميكالىق بايلانىستى كەڭەيتۋدەن تىس، قورعانىس سالاسىندا دا ىنتىماقتاستىقتى دامىتۋ تۋرالى كەلىسىم جاساستى. بۇل تۋرالى شينحۋا اگەنتتىگى حابارلايدى.

ەستەرىڭىزگە سالا كەتەيىك, جاپون پرەمەر-ءمينيسترى 9 اقپان كۇنى اقش-قا ساپارلاي بارعان بولاتىن. شيندزو ابەنىڭ بۇل ساپارىنا ساراپتاۋشىلار اقش-جاپونيانىڭ ساۋدا-ەكونوميكالىق سەلبەستىگىن كەڭەيتۋدى كوزدەپ وتىر دەپ بولجاعان. الايدا، كەلىسسوزدەگى نەگىزگى تاقىرىپتاردىڭ قاتارىندا كەڭەيتىلگەن اسكەري ىستەر، قورعانىس سالاسىنداعى ىنتىماقتاستىق تا قامتىلىپ وتىر.

ەكى ەلدىڭ باسشىلارى كەزدەسۋدەن كەيىن بىرگە جاساعان ءباسپاسوز ماجىلىسىندە، اقش اسكەري تەحنيكانى قامتىعان، بارلىق اسكەري كۇشپەن جاپونيانىڭ ىشكى-سىرتقى قاۋىپسىزدىگىن قورعايتىن بولىپ كەلىسكەن. جانە بۇل مىندەتتەمەسىن اسا بەرىك كەلىسىمشارتپەن بەكىتكەن.

ەكونوميكا مەن ساۋدا سالاسىندا ەكى ەل باسشىلارى اقش-جاپونيا اراسىندا ەكىجاقتى ساۋدا-ەكونوميكالىق كەلىسىمدەر مەن ينۆەستيتسيا الماسۋدى دامىتاتىندارىن اتاپ ءوتتى. مالىمدەمەدە بەلگىلى بولعانداي، اقش-تىڭ ترانس-تىنىق مۇحيت ەركىن ساۋدا شارتىنان باس تارتقانىن ەسكەرە وتىرىپ، قوس تاراپ ەكى ەلدىڭ مۇددە-تالاپتارىنا ساي جاڭا كەڭەستەر وتكىزبەك. ساۋدا جانە ەكونوميكا ماسەلەلەرىندەگى ەكىجاقتى ديالوگتى جاپون پرەمەر-ءمينيسترىنىڭ ورىنباسارى تارو اسو مەن اقش ۆيتسە-پرەزيدەنتى بەرنسكە تاپسىرىلعان.

ترامپ وسىدان بۇرىن ايتىپ كەلە جاتقانىنداي جاپونيانىڭ ۆاليۋتا باعامى ساياساتىن سىنعا الدى. بۇل بولاشاقتا، اقش پەن جاپونيا اراسىندا ساۋدا تاپشىلىعىن تۋدىراتىن فاكتور دەپ كورسەتتى. بۇعان قوسا، جاپون قورعانىسىنا جاسالاتىن اسكەري كومەك، جاپون ارمياسىن قۋاتتى اسكەري كۇشكە اينالدىرۋىنان الاڭدايتىنىن دا جاسىرمادى.

“The Qazaq Times”