III-دۇنيەجۇزى كوشپەندىلەرى ويىنىن كورۋگە شەتەلدەن 70 مىڭعا جۋىق تۋريست كەلگەن. بۇل 2016 جىلمەن سالىستىرعاندا ءۇش ەسەگە كوپ دەپ مالىمدەدى قىرعىزستان تۋريزم دەپارتامەنتىنىڭ باسشىسى ازامات جامانگۋلوۆ.

ونىڭ سوزىنشە، 2016 جىلى ويىنداردىڭ اشىلۋ سالتاناتىن تاماشالاۋعا قىرشىن جايلاۋىنا 30 مىڭعا جۋىق ادام كەلسە، بيىلعى اشىلۋ راسىمىنە 150 مىڭ ادام كەلگەن. 2016 جىلى ويىندارعا 20 مىڭعا جۋىق شەتەلدىك كەلگەن، ال بيىل ولاردىڭ سانى 60 مىڭنان اسقان.

ءۇشىنشى دۇنيەجۇزى كوشپەندىلەر ويىندارىندا 56 ەلدەن 50 تەلەارنا، 12 راديوستانتسيا، 67 اقپارات اگەنتتىگى مەن 48 گازەتتەن 600-دەن اسا جۋرناليست حابار تاراتقان.

كوشپەندىلەر ويىندارىنىڭ قورىتىندىسى بويىنشا، جالپى ەسەپتە 40 التىن، 32 كۇمىس جانە 31 قولا مەدال العان قىرعىزستان كومانداسى ءبىرىنشى ورىن يەلەنگەن.

ەكىنشى ورىن العان قازاقستان كومانداسىنىڭ قورجىنىندا 18 التىن، 24 كۇمىس جانە 34 قولا مەدال بار.

ءۇشىنشى ورىندى 17 التىن، 12 كۇمىس جانە 27 قولا مەدال ۇتقان رەسەي كومانداسى ەنشىلەدى.

بۇدان كەيىنگى ورىنداردا تۇركىمەنستان (27 مەدال), وزبەكستان (33 مەدال), ۆەنگريا (12 مەدال), يران (12 مەدال), ۋكراينا (9 مەدال), موڭعوليا (17 مەدال) جانە تۇركيا (6 مەدال) كوماندالارى تۇر.

ويىنداردىڭ جالپى جۇلدە قورى 28 ميلليون سومدى (403 مىڭ دوللار) قۇراعان.

قىرعىزستان دۇنيەجۇزى كوشپەندىلەر ويىندارىن العاش رەت 2014 جىلى وتكىزدى. 2016 جىلى ەكىنشى ويىندار ءوتتى.

كەلەسى، ءتورتىنشى دۇنيەجۇزى كوشپەندىلەر ويىندارى 2020 جىلى تۇركيادا وتەدى.

"The Qazaq Times"