سالۆيني: يتالياداعى قىلمىستىڭ جارتىسىن بوسقىندار جاسايدى

وسى اپتادا، 3-7 قىركۇيەك ارالىعىندا يتاليا پوليتسياسى 528 ادامدى قاماۋعا الدى. ولاردىڭ جارتىسى بوسقىندار. سونىمەن قاتار، 2478 قىلمىسكەردىڭ قىلمىسى اشكەرەلەنگەن. بۇل توپتىڭ دا  50%-ىن بوسقىندار قۇرايدى. بۇل تۋرالى ءوزىنىڭ تۆيتتەر پاراقشاسىندا يتاليانىڭ ۆيتسە-پرەمەرى، ىشكى ىستەر ءمينيسترى ماتتەو سالۆيني جازدى، - دەپ حابارلايدى «haberler.com».

«بوسقىندار سانىنىڭ ارتۋى قىلمىستىڭ ارتقانىن بىلدىرەدى. ماعان تاعىلعان ايىپتاۋلارعا قاراماستان، مەن ءۇشىن ەلىمىزگە كەلۋشى بوسقىنداردىڭ سانىن ازايتۋىمىز ۇلكەن ماقتانىش»، - دەدى سالۆيني.

بۇدان بۇرىن يتاليانىڭ اگريدجەنتو قالاسى مەن پالەرمو وكرۋگىنىڭ پروكۋراتۋراسى ۆيتسە-پريمەرگە قاتىستى ايىپتاۋ اكتىسىن دايىنداپ، ونى مينيسترلىك تريبۋناسىنا جىبەرگەن ەدى. سالۆينيگە «Diciotti» كەمەسىندەگى ازاماتتاردى زاڭسىز ۇستادى دەگەن ايىپ تاعىلعان بولاتىن.

ەسكە سالايىق، وتكەن تامىز ايىندا يتاليا جاعالاۋ كۇزەتىنىڭ «Diciotti» كەمەسى بورتىنا 177 زاڭسىز بوسقىندى ەو ەلدەرىنىڭ قايسىسىنا جىبەرىلەتىنى تۋرالى شەشىم شىعارىلعانعا دەيىن بورتىنا العان ەدى.  ەۋروپانىڭ 5 ەلى ولاردى قابىلداۋعا دايىن ەكەنىن حابارلاعانمەن، كەيىن بۇل ۋادەلەرىنەن اينىپ قالدى.

“The Qazaq Times”